STARTAP AZƏRBAYCAN

StartupBlink beynəlxalq təşkilatının 2025-ci il üçün açıqladığı Qlobal Startap Ekosistemi Hesabatına əsasən, Azərbaycan bu reytinqdə 6 pillə irəliləyərək 100 ölkə arasında 74-cü yerə yüksəlib. Bakı isə şəhərlər üzrə sıralamada 47 pillə irəliləyərək ciddi inkişaf nümayiş etdirib.

Xeberler.az xəbər verir ki, 2024 cü ildə Azərbaycan yalnız 4 pillə, 2023 cü ildə isə cəmi 1 pillə irəliləmişdi. 2021-ci ildə ölkə reytinqdə 19 pillə geriləyərək geriləmə ilə yadda qalmışdı.

Qeyd edək ki, StartupBlink şirkətinin Global Startup Ecosystem Hesabatı hər il hər bir ölkə üzrə ekosistemin müxtəlif sahələrini xarakterizə edən Kəmiyyət, Keyfiyyət və Biznes Mühiti indeksləri əsasında formalaşır. 

StartupBlink-ə görə, 2024-cü ildə sektorda 24.5% dinamika müşahidə olunub. Reytinq, ekosistemin kəmiyyət, keyfiyyət və biznes mühiti üzrə müxtəlif indikatorlar əsasında qiymətləndirilməsi ilə tərtib edilir.

Regional mövqelər

• 42-ci yer – Ukrayna
• 54-cü yer – Ermənistan
• 70-ci yer – Qazaxıstan
• 71-ci yer – Gürcüstan
• 74-cü yer – Azərbaycan
• 84-cü yer – Belarus

Azərbaycanda son 6 illik dinamika isə belə olub:

• 2020 – 70-ci yer
• 2021 – 89-cu yer (19 pillə geriləmə)
• 2022 – 85-ci yer (4 pillə irəliləmə)
• 2023 – 84-cü yer (1 pillə irəliləmə)
• 2024 – 80-ci yer (4 pillə irəliləmə)
• 2025 – 74-cü yer (6 pillə irəliləmə) 

Məsələyə Azərbaycan İnternet Formunun Prezidenti, ekspert Osman Gündüz münasibət bildirib.

Ekspertin sözlərinə görə, uzun illər StartupBlink ilə Azərbaycanın tərəfdaşlığı ASAN xidmət ilə həyata keçirilirdisə, bu ildən etibarən Rəqəmsal İnkişaf və İnnovasiya Agentliyi (İRİA) təşkilatın Azərbaycan üzrə rəsmi tərəfdaşı kimi çıxış edir:

“Bu ölkədəki startap ekosistemi ilə bağlı məlumatların artıq İRİA tərəfindən təqdim olunması deməkdir. Ehtimal olunur ki, bu ilki məlumatlar birgə şəkildə təqdim olunub.

Xatırladıram ki, uzun illər StartupBlink qurumu ilə Azərbaycan tərəfdən ASAN partnyorluq edib". 

Görəsən bu açıqlanan reytinq reallığı əks etdirirmi? 

Ekspert bildirib ki, ötən il sektora cavabdeh olan İRİA, KOBİA və ASAN tərəfindən müəyyən addımlar atılıb: 

"Xüsusən də İRİA tərəfindən bəzi əhəmiyyətli addımlar daha çox gözə çarpıb. Bakıda Azərbaycan İnnovasiya Mərkəzi fəaliyyətə başlayıb, bəzi bölgələrdə də bu istiqamətdə addımlar atılır. 

Qanunvericiliklə bağlı, xüsusən də İRİA üçün ekosistemin inkişafına yönəlik maliyyə vəsaitlərindən istifadə ilə bağlı Qaydalar Prezident tərəfindən təsdiqlənib. SABAH.HUB-ın aktivliyi də diqqət cəlb edib. Startap şəhadətnaməsi alan subyektlərin sayı da xeyli artıb". 

Osman Gündüz qeyd edib ki, ciddi problemlər qalmaqdadır: 

"Xüsusən də investisiya əlçatanlığı, ilkin inkişaf dövrü keçirən startaplara dəstək, vençur qanunvericiliyin qəbul edilməməsi, universitetlərdə startap və innovasiyaların inkişafına dəstək və s. istiqamətlərdə problemlər var. 

Düşünürəm ki daha böyük resurslara sahib olan, ekosistemin əsas cavabdeh qurumu olan İRİA əvvəllər olduğu kimi bəsit tədbirlərə və səmərəsiz xarici səfərlərə deyil, real və fayda verən işlərə fokuslanmalıdır".