TELEKOMMUNİKASİYA

Bakıda keçirilən Ümumdünya Telekommunikasiyanın İnkişafı Konfransı (WTDC-25) çərçivəsində İnformasiya Kommunikasiya Texnologiyaları Agentliyi (İKTA) ilə Birləşmiş Ərəb Əmirliklərinin Telekommunikasiyaların və Rəqəmsal Hökumətin Tənzimlənməsi Qurumunun (TDRA) nümayəndələri arasında görüş keçirilib.

Xeberler.az bildirir ki, görüşdə İKTA İdarə Heyətinin sədri Nail Mərdanov rəhbərlik etdiyi qurumun fəaliyyəti, son illərdə həyata keçirilən institusional islahatlar və beynəlxalq təşkilatlarla qurulan əməkdaşlıq barədə məlumat verib. Qeyd edib ki, qısa müddətdə Agentlik Beynəlxalq Telekommunikasiya İttifaqı da daxil olmaqla müxtəlif beynəlxalq qurumlar və xarici ölkələrin tənzimləyiciləri ilə əlaqələri genişləndirib:

“Tənzimləmə sahəsində beynəlxalq təcrübənin öyrənilməsi bizim üçün prioritetdir. Bu əməkdaşlıqlar həm idarəetmə modellərinin təkmilləşməsinə, həm də ölkəmizdə yeni formalaşan tənzimləmə mexanizmlərinin müasir tələblərə uyğun qurulmasına mühüm töhfə verir,” – deyə Nail Mərdanov bildirib.

Görüşdə, həmçinin OOKLA şirkətinin intellektual platformaları əsasında əldə edilən “crowdsource” məlumatlardan istifadə etməklə aparılan monitorinqlərin nəticələri və bu sahədə əldə olunan nailiyyətlər müzakirə olunub.

BƏƏ tərəfi TDRA-nın 2003-cü ildən bəri telekommunikasiya sektorunun tənzimlənməsi üzrə 22 illik təcrübəyə malik olduğunu qeyd edərək, bu təcrübənin İKTA ilə bölüşülməsinə hazır olduğunu vurğulayıb.

TDRA rəsmiləri bildiriblər ki, qarşılıqlı əməkdaşlıq Azərbaycanın tənzimləyici potensialının gücləndirilməsinə əhəmiyyətli dəstək verəcək:

“Azərbaycanla tənzimləmə sahəsində təcrübə mübadiləsi aparmaqdan məmnunuq. Bu əməkdaşlıq hər iki ölkə üçün qarşılıqlı faydalı nəticələr verəcək,” – deyə BƏƏ nümayəndələri qeyd ediblər.

Görüşün sonunda tərəflər telekommunikasiya sektorunun tənzimlənməsi sahəsində əməkdaşlığın daha da genişləndirilməsi, təcrübə mübadiləsi proqramlarının artırılması və mütəmadi görüşlərin keçirilməsi barədə razılığa gəliblər.