Azərbaycanın süni intellekt sahəsində həyata keçirdiyi təşəbbüslər beynəlxalq səviyyədə növbəti dəfə tanınıb.
Xeberler.az bildirir ki, Beynəlxalq Nəqliyyat Forumunun (BNF) dərc etdiyi “Bacarıqlar bizi irəli aparır: süni intellekt dövründə nəqliyyat sahəsində işçi qüvvəsinin bacarıqları – xülasə və nəticələr” adlı hesabatda ölkəmizin təcrübəsinə xüsusi yer ayrılıb.
Hesabatda süni intellektin tətbiqi fonunda işçi qüvvəsinin bacarıqlarının inkişafı ilə bağlı siyasət yanaşmaları təhlil olunub və dövlətlər üçün əsas istiqamətlər müəyyən edilib. Bu çərçivədə “Azərbaycan Respublikasının 2025–2028-ci illər üçün süni intellekt Strategiyası” müsbət nümunə kimi təqdim olunub.
Qeyd edilib ki, Azərbaycanın yanaşması süni intellekti əmək bazarı üçün risk deyil, peşəkar inkişaf üçün yeni imkan kimi qiymətləndirir. Strategiyada ictimaiyyətin məlumatlılığının artırılması, texnologiyanın etik və məsuliyyətli istifadəsinin təşviqi əsas prioritetlər sırasında yer alır.
Bu məqsədlə Milli Süni İntellekt Mərkəzi nəzdində yaradılmış Süni İntellekt Akademiyası vasitəsilə ilkin biliklərdən başlayaraq daha dərin STEM əsaslı təlim proqramları həyata keçirilir. Strategiya çərçivəsində müxtəlif dövlət qurumları üzrə 500 əməkdaşın təlimi və 3000 nəfərlik süni intellekt mütəxəssisi icmasının formalaşdırılması planlaşdırılır.
Hesabatda ümumilikdə vurğulanır ki, nəqliyyat sektorunda süni intellektin tətbiqi yalnız texnoloji inkişaf deyil, eyni zamanda əmək bazarının transformasiyası və bacarıqların inkişafı məsələsidir.
Ekspertlərin fikrincə, Azərbaycanın bu sahədə yanaşmasının beynəlxalq səviyyədə qeyd edilməsi ölkənin süni intellekt, rəqəmsallaşma və innovasiya istiqamətində həyata keçirdiyi siyasətin düzgün istiqamətdə olduğunu bir daha təsdiqləyir.
