TEXNOLOGİYA

İqtisadi İslahatların Təhlili və Kommunikasiya Mərkəzi (İİTKM) Böyük Britaniyada yerləşən nüfuzlu beynəlxalq media qurumu – “Brands Review Magazine Ltd” tərəfindən təşkil olunan “Brands Review Magazine Awards 2025” müsabiqəsində “Texnologiya” nominasiyası üzrə yüksək mükafatla təltif olunub.

Xeberler.az bildirir ki, mərkəz bu mükafata “Ağıllı Monitorinq və Qiymətləndirmə Sistemi: 2025 Azərbaycan üçün süni intellektə hazır məlumat idarəetmə innovasiyası” (Smart M&E System: An AI-Ready Data Governance Innovation – Azerbaijan 2025) adlı layihəsinə görə layiq görülüb.

Bu, İİTKM-in dövlət idarəçiliyində süni intellektə əsaslanan yanaşmaların tətbiqi, qabaqcıl məlumat idarəetmə həllərinin formalaşdırılması və qərarvermə mexanizmlərinin rəqəmsallaşdırılması istiqamətində əldə etdiyi uğurların beynəlxalq səviyyədə tanınması deməkdir.

Mükafat üzrə namizədlərin qiymətləndirilməsi zamanı Mərkəzin dövlət proqramlarının monitorinqi və qiymətləndirilməsi üçün qurduğu süni intellektə inteqrasiya olunmuş çevik məlumat idarəetmə sistemi, bu sistemdə real vaxt üzrə analitika, coğrafi informasiya texnologiyaları (GİS), video-monitorinq və nəticəyönümlü idarəetmə mexanizmlərinin uğurlu inteqrasiyası xüsusi vurğulanıb.

Bu beynəlxalq nailiyyət Azərbaycan Respublikasının 2025–2028-ci illər üçün Süni İntellekt Strategiyası ilə tam uzlaşır. Strategiyada süni intellekt texnologiyalarının tətbiqi vasitəsilə məlumat əsaslı idarəetmə, ağıllı hökumət alətləri və dövlət orqanlarında rəqəmsal qərarvermə mexanizmlərinin inkişaf etdirilməsi əsas prioritetlər kimi müəyyən olunub. İİTKM-in bu istiqamətdə atdığı konkret və sistemli addımlar Azərbaycanın süni intellekt dövrünə keçid prosesində mühüm rol oynayır.

“Texnologiya” nominasiyasında yalnız İİTKM deyil, həmçinin milli, regional və beynəlxalq səviyyədə fəaliyyət göstərən dövlət və özəl qurumlar, texnoloji startaplar və qabaqcıl idarəetmə institutları da iştirak ediblər. Mərkəzin bu mükafata layiq görülməsi onun qlobal texnoloji idarəetmə ekosistemində lider aktor kimi mövqeyini bir daha təsdiqləyib. Əldə edilən bu uğur İİTKM-in süni intellekt (Sİ) və rəqəmsal texnologiyalar əsasında yeni nəsil idarəetmə modelini uğurla tətbiq etdiyini, eləcə də Azərbaycanda rəqəmsal dövlətçiliyin və Sİ-yönümlü idarəetmə arxitekturasının artıq beynəlxalq miqyasda nümunəyə çevrildiyini göstərir.

Mərkəzin formalaşdırdığı ağıllı, adaptiv və dayanıqlı idarəetmə sistemi yalnız yerli deyil, həm də qlobal səviyyədə tətbiq oluna bilən innovativ texnoloji və institusional model kimi dəyərləndirilir və Azərbaycan təcrübəsinin süni intellekt əsaslı idarəetmə sahəsində aparıcı nümunəyə çevrildiyini sübut edir.