TƏHLİL VƏ RƏYLƏR

Ölkəmiz üçün 2025-ci il bir sıra mühüm ictimai-siyasi hadisələrlə tarixə həkk olunub. Keçən ilin 8 avqustunda Azərbaycan Respublikasının Prezidenti İlham Əliyevin Amerika Birləşmiş Ştatları Prezidenti Donald Trampın iştirakı ilə Azərbaycanla Ermənistan arasında Sülh müqaviləsinin müddəalarının paraflanmasına nail olması böyük tarixi hadisədir. Azərbaycana Qarabağda tarixi Zəfər qazandırmış, Böyük Qayıdış hərəkatını uğurla həyata keçirən, ölkəmizin hərtərəfli inkişafına nail olmuş Prezident İlham Əliyevin dünyada Sülhün beynəlxalq təminatçılarından biri kimi yüksək nüfuz qazanması, müstəqil Azərbaycan Respublikası və Azərbaycan xalqı üçün böyük şərəf və iftixardır.

Xeberler.az məlumat verir ki, bu sözləri Azərbaycan Milli Elmlər Akademiyasının prezidenti akademik İsa Həbibbəyli AMEA-nın 2025-ci ilin elmi yekunlarına həsr edilmiş Ümumi yığıncağında “Azərbaycanşünaslıqdan rəqəmsallaşmaya və beynəlxalq əlaqələrə” mövzusunda məruzəsində bildirib.

İsa Həbibbəylinin sözlərinə görə, Prezidentin AMEA-nın 80 illik yubileyində səsləndirdiyi proqram xarakterli çıxış Azərbaycan elmi üçün yol xəritəsi rolunu oynayıb. Dövlət başçısının çağırışlarına uyğun olaraq, xüsusilə ana dilinin qorunması və inkişafı istiqamətində mühüm addımlar atılıb.

AMEA rəhbəri vurğulayıb ki, texnoloji inkişaf, rəqəmsallaşma, süni intellekt və kibertəhlükəsizlik XXI əsr elminin əsas istiqamətləridir:

"Ümumi yığıncağa hesabat vermək istəyirəm ki, IV Sənaye inqilabının çağırışları ilə səsləşən bu qlobal trendlər Azərbaycan elmini ciddi surətdə məşğul edir. Hesabatını təqdim etdiyimiz 2025-ci ildə Azərbaycan Milli Elmlər Akademiyasında elektronlaşmadan rəqəmsallaşmaya və süni intellektə kimi prosesləri yaşanıb. Akademiyanın Rəyasət Heyətində 2023-2024-cü illərdə yaradılmış “Elektron xidmətlər” şöbələrinin 2025-ci ildə adlarının dəyişdirilərək “Rəqəmsal elm sahəsi və süni intellekt” adlandırılması həm də onların praktik elektron xidmətləri deyil, tədqiqatyönümlü funksiyaları yerinə yetirmələrinin göstəricisidir".

Həmçinin 2025-ci ildə Elektron kitabxana hərəkatının sürətləndirilməsi və ilk dəfə olaraq Elektron Arxiv proqramının həyata keçirilməsinə başlanılması da ölkə rəhbərimizin qarşımıza qoyduğu vəzifələrin həlli istiqamətində gerçəkləşdirilmiş layihələrdir”, - deyə AMEA rəhbəri bildirib.