TƏDBİRLƏR

Bakı Mühəndislik Universitetində (BMU) Texnoparkın təşkilatçılığı ilə Dünya Robot Çempionatına (World Robotics Championship - WRC) dair infosessiya  keçirilib.

Tədbirdə iştirak edən WRC-nin Azərbaycan üzrə kuratoru Abdulxaliq Cəbrayıl  BMU tələbələrinə yarış haqqında ətraflı məlumat verib. Bildirib ki, WRC 8-30 yaşarası iştirakçıların robototexnika sahəsində istedadlarını nümayiş etdirmələri üçün təşkil olunan qlobal turnirdir. Çempionat gənc mühəndislərə texnologiyanın öncüllüyünü hiss etmək, kreativ düşüncə və komanda işini inkişaf etdirmək üçün əhəmiyyətli imkanlar yaradır.

Xeberler.az məlumat verir ki, yarış hər il müxtəlif robototexnika kateqoriyaları- Bots Combat (Uzaqdan idarə olunan döyüş robotlarının mübarizəsi), RC Craft (Uçuş aparatlarının dizaynı və idarəedilməsi üzrə yarışlar), Drone Racing & Drone Soccer ( Sürət və bacarıq əsaslı dron yarışları), RoboSoccer (Robot futbol komandalarının rəqabəti), Fastest Line Follower (Avtonom xətt izləyici robotların yarışı) üzrə keçirilir.

Sessiya zamanı yarışın Azərbaycan final mərhələsinin 7-8 iyun 2025-ci ildə Xankəndi şəhərində keçiriləcəyi və qalib gələn komandaların 24-27 avqust tarixlərində Hindistanda dünyanın müxtəlif ölkələrindən gələn komandalarla yarışmaq imkanı qazanacağı bildirilib.  Əlavə olunub ki, təlim və hazırlıq prosesi fevral-may aylarında təşkil ediləcək, habelə iştirakçılara WRC komitəsinin ekspertləri tərəfindən dəstək göstəriləcək.

Qeyd edək ki, yarışma üçün qeydiyyat davam edir və maraqlananlar bu linkdən  https://forms.gle/XC7D71vSvU6nCnFq5 istifadə edə bilərlər.