TEXNOLOGİYA

“Azəriqaz” İstehsalat Birliyi tərəfindən qaz təchizatı sisteminin yenidən qurulması, həmçinin ödənişlərlə bağlı əməliyyatların artması ilə əlaqədar yarana biləcək texniki problemləri aradan qaldırmaq məqsədi ilə bir sıra yeniliklər tətbiq edilir.

Bakı şəhəri və Abşeron rayonunda abonentlərin mənzillərində quraşdırılmış 17 min 972 ədəd “Actaris” Gulf tipli qaz sayğaclarının ödəniş xidmətləri yalnız Bakı şəhərində yerləşən “Kapital” bankın filiallarındakı terminallarda “TaleXus” proqramı vasitəsilə həyata keçirilir.

Həmin proqram təminatında tez-tez nasazlıqların yaranması, “Gulf” tipli qaz sayğaclarının kartlarına ödəniş zamanı abonentlərə bir sıra çətinliklər yaradır. Bunun qarşısını almaq, eyni zamanda abonentlərin istehlak etdiyi təbii qaza görə ödənişləri daha yüksək keyfiyyətlə həyata keçirmələri üçün Bakı şəhəri və Abşeron rayonu ərazilərində qazlaşdırma işləri aparılarkən artıq kütləvi şəkildə “Gulf” tipli sayğaclar deyil, “İtron” tipli smart qaz sayğacları quraşdırılır.

“Gulf” tipli sayğaclara malik olan 17 min 972 abonent də yaddan çıxarılmır. Belə ki, onların ödənişləri daha rahat aparmaları üçün “Actaris” Gulf tipli sayğacların proqram təminatının dəyişdirilməsi və “İtron” smart tipli qaz sayğaclarına uyğunlaşdırılmasına başlanılıb. Bu istiqamətdə işlər davam etdirilir.

Birliyin mütəxəssisləri yerindəcə xüsusi servis kartları vasitəsilə yeni proqramı sayğaclara yükləyir, həmin proqrama uyğun kartları abonentlərə təqdim edirlər. İşlər başa çatdırıldıqdan sonra “Actaris” Gulf tipli qaz sayğaclarından istifadə edən abonentlər smart-kartlara ödənişləri yalnız “Kapital” bank filiallarından deyil, istənilən ödəniş terminallarından həyata keçirə biləcəklər.(Azərtac)