Bakıda yeni Biznes İnkubasiya Mərkəzi açılıb

22-10-2015 / 22:58

"Vətəndaş Cəmiyyətində Debat" İctimai Birliyi (DVC), Gənclər və İdman Nazirliyi və Coca-Cola şirkətinin birgə həyata keçirdiyi Youth Inc. gənc sahibkarlıq proqramı çərçivəsində Bakıda gənclər üçün Biznes İnkubasiya Mərkəzinin açılış mərasimi keçirilib.

Xeberler.az-ın məlumatına görə, tədbirdə Azərbaycanın gənclər və idman naziri Azad Rəhimov, Coca-Cola şirkətinin Azərbaycan üzrə market-meneceri Qabil Əhmədov, DVC-nin sədri Seymur Hüseynov, həmçinin proqramın tərəfdaş təşkilatları və media nümayəndələri iştirak ediblər.

Youth Inc. Biznes İnkubasiya Mərkəzinin yaradılmasının əsas məqsədi Azərbaycanda gənc sahibkarlığın inkişaf etdirilməsi üçün əlverişli platformanın yaradılması, şəxsi bizneslərini qurmaq istəyən gənc liderlərin təşəbbüslərinin dəstəklənməsidir.

Açılış mərasimində çıxış edən DVC-nin sədri Seymur Hüseynov ruhlandırıcı dizayna malik mərkəzin gələcək sahibkarların öz ideyalarını daha effektiv reallaşdırması üçün bütün gərəkli avadanlıqlarla təchiz edildiyini vurğulayıb. O, həmçinin qeyd edib ki, mərkəzdə gənclər bizneslərini qurmaq üçün tələb olunan müxtəlif resurslardan faydalana bilərlər.

Qeyd edək ki, Azərbaycanda 2013-cü ilin yanvar ayından uğurla həyata keçirilən Youth Inc. proqramı Coca-Cola, Gənclər və İdman Nazirliyi və DVC təşkilatının dəstəklədiyi uzunmüddətli gənclər proqramıdır. Youth Inc.-in aktiv fəaliyyət göstərdiyi illər ərzində proqram məzunları 8 müxtəlif biznes-layihələr həyata keçirib, 5 minə yaxın gənc seminarlarda iştirak edib. Bu istiqamətdə proqram çərçivəsində yeni fəaliyyətə başlayacaq Biznes İnkubasiya Mərkəzi Lev Tolstoy küçəsi, 131 ünvanında yerləşir.

Mərkəz Azərbaycan gəncləri üçün açıq tipli müstəqil biznes inkubator olaraq gənc sahibkarlara 20 nəfərin eyni vaxtda işləməsi üçün nəzərdə tutulmuş 165 kv.metr sahəli ofis məkanı və ləvazimatlar ilə yanaşı, müvafiq infrastruktur, maliyyə və investisiya, şəbəkələşmə, təlim-tədris proqramı, brendinq kateqoriyaları üzrə unikal xidmətlər təklif edir.

Mərkəz haqqında ətraflı məlumatı www.youthinc.az saytından əldə etmək mümkündür.

Xeberler.az


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.