İNNOVASİYA VƏ STARTAP

Azərbaycan Gənclər və İdman Nazirliyi və Coca-Cola şirkətinin dəstəyi ilə keçirilən Youth Inc. gənclərin sahibkarlıq proqramı çərçivəsində təşkil olunan “Paylaş! Qazan! Biznesinə Başla!” adlı onlayn müsabiqənin qalibləri müəyyənləşib.

Müsabiqənin ilkin mərhələsində iştirak edən 698 nəfərdən 65-i ideyalarını təqdim edib və final mərhələsində iştirak üçün 9 ideya seçilib ki, nəticədə 4 qalib ideya DVC (Vətəndaş Cəmiyyətində Debat İctimai Birliyi) tərəfindən icra olunan Youth Inc. proqramından ilkin investisiya əldə edib.

Xeberler.az-ın məlumatına görə, Youth Inc. Biznes İnkubasiya Mərkəzində baş tutmuş bağlanış və mükafatlandırma mərasimində müsabiqə iştirakçıları ilə yanaşı, proqramın tərəfdaş nümayəndələri də iştirak edib.

Tədbirdə  Azərbaycan Respublikası Gənclər Təşkilatları Milli Şurasının və DVC-nin sədri Seymur Hüseynov bildirib ki, gənclərin sahibkarlıq proqramı olan Youth Inc. gənclərdə sahibkarlıq anlayışının və biznes ideyaların formalaşması, inkişafı və icrası üçün xidmət və imkanlar təklif edir:

"Sahibkarlığa maraq göstərən gənclərin axtarışında olan Youth Inc. bu istiqamətdə müxtəlif müsabiqələr, təlim və tədbirlər təşkil edir. Bunlardan biri də “Paylaş! Qazan! Biznesinə Başla!” adlı onlayn müsabiqə oldu. “Biznes ideyanız PAYLAŞıldığı qədər qazandırsın!” şüarına əsaslanan bu layihə gənc sahibkarların biznes ideyalarının geniş ictimaiyyət arasında tanıdılması və onların potensial investorlara təqdim olunması məqdəsi ilə həyata keçirilib”.

Tədbirdə çıxış edən Coca-Cola şirkətinin Qafqaz və Mərkəzi Asiya ölkələri üzrə kommunikasiya meneceri Elşad Fərzəliyev qeyd edib ki, Coca-Cola fəaliyyət göstərdiyi bütün ölkələrdə cəmiyyətin inkişafı istiqamətində uzunmüddətli layihələr həyata keçirir:

"Bu cür layihələrdən biri də gənclərin iqtisadi imkanlarının yüksəldilməsinə xidmət edən Youth Inc. gənclərin sahibkarlıq proqramıdır. Fəaliyyətdə olduğu illər ərzində proqram çərçivəsində minlərlə gənc sahibkarlıq fəaliyyəti ilə bağlı bilik və təcrübə əldə edib. Biz çox şadıq ki, artıq uğurla yekunlaşmış müsabiqə yeni bizneslərin qurulmasına dəstək olacaq.

Bu da ümumilikdə ölkədə yeni iş yerlərinin yaradılmasına və ölkədə gənc sahibkarlığın inkişafına öz töhfəsini verəcək".

 Youth Inc. proqramının koordinatoru Müşviq Həsənovun birbaşa iştirakı ilə icrası və investisiya ehtimalı daha real olan biznes ideyalar müsabiqənin final mərhələsində iştirak üçün seçilib.

Seçilmiş ideyaların müəllifləri ilə görüş təşkil edilərək layihələrin icrası zamanı yarana biləcək iqtisadi, hüquqi, texniki problemlər, ilkin kapitalda çatışmazlıq, bazarın təhlili, investor dəstəyi və s. məsələlər müzakirə edilib.

Növbəti mərhələdə seçimi təsdiqlənmiş ideyalar müvafiq dizayn ilə Youth Inc. rəsmi Facebook səhifəsində istifadəçilərin paylaşım (share) ixtiyarına buraxılıb. Beləliklə, 14 gün ərzində azad və sağlam rəqabət şəraitində 9 ideyanın hər biri bəyənilən şəxslər tərəfindən müxtəlif sayda paylaşılıb ki, bu da ideyaların reallaşması üçün paylaşım sayına uyğun maksimum investisiyanın əldə edilməsində dəstək olub.

Tədbirin sonunda müsabiqənin nəticələrinə görə, ən çox paylaşılan ideya sahiblərinin adları açıqlanıb.

Qaliblər siyahısında Free Wifi layihəsi ilə Teymur Kuseba, Velokuryer layihəsi ilə Tofiq Hidayətzadə, Starbukz layihəsi ilə Kənan Məmmədov və Edu-Map.org layihəsi ilə Rasim Abdurəhmanov yer alıb.

Sözügedən layihə müəllifləri investisiya ilə yanaşı Youth Inc. Biznes İnkubasiya Mərkəzinin imkanlarından faydalana biləcək.

Free WiFi layihəsi şəhərin əsas yerlərində (alış-veriş mərkəzləri, kafe və restoranlar, mərkəzi küçələr və s.) yerləşdirilmiş xüsusi qurğular vasitəsilə internet təminatının həyata keçirilməsini nəzərdə tutur. 

Layihə heç bir şifrə tələb olunmadan 5-10 saniyəlik sosial video çarxı izləməklə limitsiz WiFi-dən istifadəni təmin edir.

Məltəm Talıbzadə