RƏQƏMSAL DÜNYA

“Bələdiyyələrin fəaliyyətinin təbliği” İctimai Birliyi ölkədəki bələdiyyələrin sosial  mediadakı fəaliyyəti ilə bağlı araşdırma aparıb.

Birlikdən Xeberler.az-a verilən məlumata  görə,  məlum olub ki, hazırda Azərbaycanda formalaşan 1607 bələdiyyənin yalnız 51-nin  Facebook səhifəsi var.

Onlardan yalnız Binəqədi rayonun beş, Mərdəkan, Astara və Nəsimi bələdiyyələrinin səhifələri daha çox aktivdir. Bu səhifələrdə daimi olaraq sakinlər arasında maarifləndirmə və məlumatlandırma işləri həyata keçirilir.

Məlumatda qeyd edilir ki, təşkilatın bu istiqamətdə apardığı araşdırmalar göstərir ki, bələdiyyələr virtual məkanda elə də aktiv görsənmirlər.

Bu gün hər bir bələdiyyədə müasir informasiya texnologiyalarına aid texnki təchizat olsa da,  bu imkanlardan  faydalı istifadə olunmur.

Birliyin araşdırmasında o da açıqlanıb ki, hazırda ümumilikdə 58 bələdiyyənin internet resursu olsa da, onlardan yalnız Nəsimi, Nizami, Nərimanov, Rəsulzadə və  Mingəçevir bələdiyyəsinin saytları mütəmadi olaraq yenilənir.

Hazırda A.A.Bakıxanov bələdiyyəsinin ən müasir internet resursunun hazırlanmasına  da başlandığı bildirilir.

Birlik belə nəticəyə gəlib ki, sosial şəbəkələrdən istifadə pulsuz olsa da bələdiyyələr buna maraq göstərmirlər.

İctimai Birlik buna səbəb maliyyə və kadrların yetərincə olmamasını göstərib.

Məltəm Talıbzadə