TƏDBİRLƏR

Fevralın 8-də “Azərkosmos”un Kosmik Akademiyasında Beynəlxalq Aerokosmik və Rəqəmsal İnnovasiyalar Forumu keçirilib.

Xeberler.az məlumat verir ki, tədbirdə əvvəlcə Azərbaycanın Dövlət Himni səsləndirilib.

Azərbaycan Kosmik Agentliyinin (“Azərkosmos”), “Nargis” Fondunun və Britaniyanın Azərbaycandakı səfirliyinin dəstəyi və “Uşaqlarımıza öyrədək” İctimai Birliyinin (İB) təşkilatçılığı ilə keçirilən forumda orta məktəblərin yuxarı sinif şagirdləri iştirak ediblər.

Tədbirdə çıxış edən “Uşaqlarımıza öyrədək” İB-nin sədri və təsisçisi Yusif Kərimli bildirib ki, forumun keçirilməsində əsas məqsəd gənclərə müxtəlif mövzularda, əsasən təbiət və dayanıqlılıqla bağlı fikirlərini sərbəst ifadə etmək, innovativ layihələrini və yaradıcı ideyalarını nümayiş etdirmək üçün platforma yaratmaqdır. “Tədbirdə gənclərin qlobal məsələləri paneldə müzakirə etməsi və sahələrində böyük təcrübəyə malik şəxslərdən dəyərli məsləhətlər alması üçün dinamik bir mühit yaradılacaq. Forumun əsas məqsədlərindən biri ideyaların mübadiləsi üçün platforma yaratmaqla yanaşı, iri şirkətlərlə gənclər arasında körpü qurmaqdır”, - deyə Yusif Kərimli əlavə edib.

Daha sonra İB-nin nümayəndəsi Səbinə Abışova “Uşaqlarımıza öyrədək” İB-nin yaradılması və fəaliyyəti barədə məlumat verib.

Sonra İB-nin fəaliyyətinə dair video təqdim olunub.

“Azərkosmos”un təhsil və tanıtım üzrə meneceri İmran Muxtarov iştirakçılara qurumun fəaliyyəti və Kosmik Akademiya barədə məlumat verib. “Bu təqdiredici təşəbbüsə görə sizi təbrik etmək istəyirəm. Əminəm ki, belə tədbirlər gənclərin kosmik biliklərinin genişləndirilməsi və marağının artırılması istiqamətində mühüm rol oynayacaq”, - deyə İ.Muxtarov bildirib.

Sonra İmran Muxtarov “Azərkosmos”un fəaliyyətinə dair təqdimatla çıxış edib.