EDUTECH

Beynəlxalq olimpiadalara hazırlaşacaq şagirdlərin seçim turu keçirilib.

Xeberler.az bildirir ki, bu haqda Təhsil Nazirliyinin pilot layihələrlə iş sektorunun aparıcı məsləhətçisi Fuad Qarayev məlumat verib. Onun sözlərinə görə, seçimlərdə təxminən 800-ə yaxın şagird iştirak edib.

“Təhsil nazirinin müvafiq əmrinə əsasən, 2015-2016-cı tədris ili üçün oktyabrın 10-17-də həm aşağı, həm də yuxarı yaş qrupu şagirdləri arasından beynəlxalq olimpiadalarda Azərbaycanı təmsil edəcək şagirdlərin seçimi başa çatıb. Bu seçim prosesi müvafiq fənlər üzrə 20-25 qruplar təşkil edərək yerinə yetirilib. Seçilən şagirdlərə noyabrın 1-dən başlayaraq dərslər keçiriləcək”.

Fuad Qarayev eyni zamanda 2019-cu ildə Azərbaycanda keçiriləcək Beynəlxalq İnformatika Olimpiadasına hazırlıqla bağlı məlumatlar verib. O bildirib ki, olimpiadaya hazırlıq məqsədilə Təhsil Nazirliyinin müvafiq əmrinə əsasən, Bakı şəhərində fizika, riyaziyyat və informatika və kimya-biologiya təmayül liseyinin nəzdində olimpiada mərkəzləri yaradılıb.

“Olimpiadada iştirak etmək istəyən şagirdlər həmin mərkəzlərə müraciət etməli, qeydiyyatdan keçməlidirlər. Bundan əlavə informatika fənninə uyğun olaraq informatika.edu.az səhifəsində şagirdlər istənilən müsabiqələrdə iştirak etmək üçün  (respublika fənn olimpiadaları, aşağı sinif fənn müsabiqələri, beynəlxalq olimpiadada iştirak edəcək şagirdlərin seçim turu ) müraciət edə bilərlər.

Fuad Qarayev onu da qeyd edib ki, informatika fənni üzrə yalnız informatika.edu.az saytında qeydiyyatdan keçmiş və orada şagirdlərə təqdim olunan tapşırıqları, məsələləri həll edib reytinq cədvəlində müəyyən bir nailiyyət əldə etmiş şagirdlər seçim turuna dəvət ediləcək.

Ruhəngiz Muradova