TƏHLİL

 Radioelektronika, kompüter texnologiyaları ilə əlaqəli bütün xarici şirkətlər Rusiyanın Ukraynaya təcavüzünə görə ölkəni tərk edib. Bu səbəbdən Rusiya vəziyyəti düzəltməyə çalışır. 

 Xeberler.az bildirir ki, bunu Azərbaycan İnternet Formunun Prezidenti, ekspert Osman Gündüz deyib. 

 Ekspertin sözlərinə görə, Rusiyanın bu sektoru yetərincə qlobal dünyaya inteqrasiya etdiyindən indi ehtiyat hissələrlə bağlı, sektorun inkişafı ilə bağlı çox ciddi problemlər yaranıb. Vəziyyətdən çıxış yolu üçün Rusiyanın İqtisadi İnkişaf Nazirliyi qeyri-adi metoda əl atıb. 

  Osman Gündüz bildirir ki, qurum SSRİ Dövlət Plan Komitəsinin prinsipləri əsasında inkişaf modeli qurmaq üzərində düşünür. İqtisadi İnkişaf Nazirliyi bununla bağlı iki gün öncə əlaqəli dövlət qurumlarına və özəl sektora rəsmi məktub ünvanlayıb.

 "Nazirlik maraqlı tərəflərdən xahiş edib ki, sektorda işin planlı təşkili ilə bağlı SSRİ Nazirlər Kabinetinin 1969-cu ildə qəbul edilən “Elektron Sənayesi Nazirliyinin əsasnaməsinin təsdiqi” haqqında sənəddəki prinsiplərə fikirlərini bildirsinlər.

 Bu sənəddə ölkə üzrə vahid texniki siyasətin müəyyən edilməsi, ixtisaslaşmanın və standartlaşmanın aparılması , vahid planlı təsərrüfatın qurulması, dövlət qurumları arasında planlamanın razılaşdırılması və s. ilə bağlı metodologiyalar öz əksini tapıb.

 Hazırda dövlət qurumları və özəl sektor Nazirliyin bu təkliflərini öyrənirlər.

 Qurumlar SSRİ2.0 sisteminə qayıdışla bağlı cavablarını bir ay müddətində təqdim etməlidirlər".