E - HÖKUMƏT

Xeberler.az bildirir ki, Uşaq hüquqlarının həyata keçirilməsinə dair elektron məlumat bankının proqram təminatında bir sıra təkmilləşdirmələr aparılıb. Bununla bağlı Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsində keçirilən tədbirdə komitənin sədri Ramilə Seyidova çıxış edərək respublikamızda dövlət uşaq siyasətinin uğurla reallaşdırıldığını vurğulayıb. Qeyd olunub ki, ölkəmiz müstəqillik əldə etdikdən sonra uşaq hüquqlarının həyata keçirilməsi istiqamətində bir sıra uğurlu addımlar atılıb.

Azərbaycan beynəlxalq konvensiyalara qoşulub, milli qanunvericilik sahəsində uşaq hüquqlarının təmin olunması istiqamətində təkmil qanunvericilik sistemi yaradılıb. "Naxçıvan Muxtar Respublikasında da dövlət uşaq siyasəti uğurla həyata keçirilir. Belə ki, Naxçıvan Muxtar Respublikası Ali Məclisi Sədrinin 2012-ci il 24 may tarixli Fərmanı ilə "Naxçıvan Muxtar Respublikasında uşaq hüquqlarının həyata keçirilməsinə dövlət nəzarəti Qaydası”nın təsdiq edilməsi bu sahədə aparılan ardıcıl və məqsədyönlü dövlət siyasətinin bariz nümunəsidir”, - deyən Ramilə Seyidova vurğulayıb ki, müvafiq fərmana uyğun olaraq Naxçıvan Muxtar Respublikası Nazirlər Kabineti "Naxçıvan Muxtar Respublikasında uşaq hüquqlarının həyata keçirilməsinə dair elektron məlumat bankının təşkili və aparılması Qaydası”nın təsdiq edilməsi haqqında” 2013-cü il 23 yanvar tarixli qərar qəbul edib.

"Naxçıvan Muxtar Respublikasında uşaq hüquqlarının həyata keçirilməsinə dövlət nəzarəti Qaydası”na uyğun olaraq Ailə, Qadın və Uşaq Problemləri üzrə Dövlət Komitəsində 2016-cı ildən uşaq hüquqlarının həyata keçirilməsinə dair elektron məlumat bankı istifadəyə verilib. Komitə sədri qeyd edib ki, məlumat bankının administratoru Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi, istifadəçiləri isə uşaq hüquqlarını qoruyan 17 təşkilatdır. Elektron məlumat bankı aidiyyəti dövlət orqanları tərəfindən daxil edilən məlumatlar əsasında formalaşır. Məsul dövlət orqanlarının müvafiq olaraq istifadəsi üçün nəzərdə tutulub. Ramilə Seyidova deyib: "Ötən dövr ərzində elektron məlumat bankına istifadəçilər tərəfindən 26 mindən çox məlumat daxil edilib. Məlumatların daha operativ daxil edilməsi və statistik təhlil aparılması məqsədilə proqram təminatında yeni təkmilləşdirmələr aparılıb.

Yenilənmiş proqram bu gündən istifadəyə verilib”. Tədbirdə proqrama operatorlar tərəfindən daxil edilən məlumatların administrator tərəfindən təhlili nəticəsində aşkarlanan nöqsanlar diqqətə çatdırılıb. Tezliklə bu nöqsanların aradan qaldırılacağı bildirilib. Sonra Naxçıvan Muxtar Respublikasının Rabitə və Yeni Texnologiyalar Nazirliyində internet saytlarının hazırlanması və təhlükəsizliyinin qorunması məsələləri üzrə işçi qrupunun rəhbəri Şahin İsmayılov elektron məlumat bankının proqram təminatında edilmiş yeniliklər barədə məlumat verib və istifadəçilərin suallarını cavablandırıb. Mərkəzi və yerli icra hakimiyyətləri orqanları tərəfindən bu sahə üzrə təyin edilmiş məsul şəxslərin iştirak etdiyi tədbirin sonunda operatorlara elektron məlumat bankının administratoru tərəfindən istifadəçi adı, parol və digər bağlantı parametrləri verilib.