TEXNOLOGİYA

Çində dünyanın ən böyük üzən günəş elektrik stansiyasının (GES) tikintisi aparılır. Bu stansiyanın tərkibində bir-birinə bağlı üzən pontonlar üzərində qurulmuş 166 min günəş batareyası var.

Xeberler.az ict.az-a istinadən məlumat verir ki, elektrik stansiyasının ümumi gücü 40 meqavat təşkil edir. Cari ilin sentyabrında isə bu rəqəm rekord həddə (150 mvt) çatacaq.

Huaynan (Huainan) şəhəri ərazisində yerləşdirilmiş Sungrow GES-i köhnə kömür şaxtalarından birinin ərazisində torpağın çökməsi nəticəsində yaranmış süni gölün səthində yerləşdirilib.

Bu stansiya dünyada yeganə üzən GES deyil. Bu kimi layihələr Yaponiya, Böyük Britaniya və İsrail kimi ölkələrdə artıq reallaşdırılıb və ya reallaşdırılma mərhələsindədir. Çinin layihəsi isə bütün layihələrdən həcminin böyüklüyünə görə fərqlənir.

Üzən GES-lər yerin səthində qurulmuş GES-lərdən 5-10 faiz daha effektivdir. Bunun səbəbi günəş batareyalarının səthinə yenidən düşən günəş işığının bəzi hissəsini suyun səthinin əks etdirməsidir. Gölün səthindən buxarlanmış su fotoqalvanik elementləri əlavə olaraq soyudur ki, bu da onun daha effektiv işləməsinə imkan verir.

Qeyd edək ki, bu layihə günəş batareyalarının fotoqalvanik elementlərinin istehsalına görə dünyada ikinci yerdə olan Sungrow şirkəti tərəfindən reallaşdırılıb.

Xeberler.az