"Gələn il üçün dövlət büdcəsində “Hökumət buludu”nun (G-cloud) yaradılması və bu sistemə qoşulmuş qurumlar üzrə müvafiq İT xərclər üçün dövlət büdcəsindən 19 milyon manat vəsait ayrılacaq".
Xeberler.az bildirir ki, bu sözləri Azərbaycan İnternet Formunun Prezidenti Osman Gündüz deyib.
Azərbaycan Respublikaısının Prezidenti İlham Əliyev 2019-cu ilin iyun ayında G-cloud yaradılması və bulud xidmətlərinin göstərilməsi haqqında fərman imzalayıb.
18 avqust 2020-ci il tarixdə isə “Hökumət buludu”na keçidlə bağlı Fərman verib. “Hökumət bulud”u layihəsinin mahiyyəti də ondan ibarətdir ki, bütün dövlət qurumlarının informasiya sistemləri və bazaları mərhələli şəkildə NRYTN Data Mərkəzinə köçürülməlidir.
Osman Gündüzün sözlərinə görə, ayrı-ayrı dövlət qurumlarında artıq yeni Data Mərkəzlərin inkişafı, informasiya resursları üçün serverlərin alınması və onlara dəstəklə bağlı məsələlər adıçəkilən Fərmana görə “Hökumət buludu” çərçivəsində nəzərdə tutulur:
"Dövlət qurumlarının bu məsələlərlə bağlı İT xərclərinin formalaşmasına məqsədəuyğunluq baxımından VXSİ Dövlət Agentliyi də rəy verəcək. Data Mərkəzin Yevlaxda daha bir ehtiyat variantı da yaradılıb.
Bəzi Nazirliklərə məxsus böyük Data Mərkəzlərin "Hökumət buludu” na miqrasiyası məsələsi də indiyədək açıq qalmışdı. Həmçinin bəzən "Hökumət buludu” nda keyfiyyətli-zəruri servislərin yetərli olmadığı haqqında da fikirlər səslənir.
Yeri gəlmişkən, Nazirliyin Data Mərkəzinə nəzarət edən AzİnTelecom-un özünün də idarəedilməsinin cari ildə Prezident Fərmanı əsasında yaradılan Holdinqin tərkibinə verilməsi nəzərdə tutulub. Belə olan halda , G-claudun idarəedilməsi məsələsi də müəyyən suallar yaradır. Oxşar layihələr Nazirlik tərkibində qalan azsaylı qurumlardan olan MHM tərəfindın idarə olunur.
Gözlənilir ki, "Hökumət buludu” layihəsinin reallaşdırılması ilə dövlət qurumları İT infrastruktur ilə bağlı xərclərin ən azı 25-30% azaldılmasına nail olacaq. Amma bəzən müşahidə olunur ki, bəzi mərkəzi icra qurumları tender keçirərək yeni server avadanlıqlarına, informasiya ehtiyatlarına və sistemlərinə dəstəyin göstərilməsi üçün hələ də büdcə resursları ayırırlar. Belə olacaqsa əksinə, büdcə xərclərinin daha da artmasını gözləmək olacaq.
Ümid edək Prezidentin fərmanının icrasına nəzarət edənlər dövlət qurumlarında İT xərclərini optimallaşdıra biləcəklər" .
