MÜSAHİBƏ

Hökumət büdcə xərclərini azaltmaq və optimallaşdırmaq məqsədilə 4-5 il bundan əvvəl Prezidentin fərmanı əsasında "Hökumət Buludu" (G-cloud) yaradıb. Yəni, bundan sonra hər bir dövlət qurumu özü üçün data mərkəz qurmağı və server avadanlığı almağı dayandırmalı və özünün bütün datasını, informasiya sistemləri və bazalarını "Hökumət Buludu"na köçürməli, zəruri bulud xidmətlərini də buradan almalı idi.

Xeberler.az bildirir ki, bu fikirləri Azərbaycan İnternet Forumunun Prezidenti, ekspert Osman Gündüz öz feysbuk səhifəsində qeyd edib.

"Bildiyim qədər G-cloud yaradılması və dəstəklənməsi məqsədilə cari il üçün 19 milyon manat vəsait ayrılması nəzərdə tutulmuşdu. Amma müşahidələr göstərir ki, G-cloud yaratmaqla nəinki xərclər azalır, əksinə, qəribə görünsə də, daha da artır. Hətta "Hökumət Buludu"na keçidlə bağlı ləngimə nəzərə alınaraq, mərhələli bir plan Prezident tərəfindən 2 il öncə təsdiqlənsə də görünür ki, dövlət qurumları miqrasiyada maraqlı deyillər.

İndi də açıqlama verilib ki, İcbari Tibbi Sığorta Üzrə Dövlət Agentliyi server və şəbəkə avadanlıqları və texniki dəstək, bulud xidmətləri ilə bağlı tender elan edib və bu məqsədlə "Ultra Technologies" şirkətinə 3 milyon 252 min manat vəsait ödəyəcək.
Xatırlayıram ki, adı çəkilən fərmandan sonra bu tip xərclər digər dövlət qurumları üçün də ayrılıb.

Sual yaranır ki, əgər bu tip büdcə xərcləri dövlət qurumlarına ayrılmaqda davam edəcəksə, onda "Hökumət Buludu"na nə ehtiyac var idi? Prezidentin fərmanı nə üçün icra edilmir?  Fərmanın icrasına kim məsuliyyət daşıyır? Bu fərmanla dövlət qurumlarında İT xərclərin 25-30% azaldılması gözlənildiyi halda nə üçün xərclər elə bu qədər də artmalı idi?

Ümid edirəm, RİNN, İT layihələrə rəylər verən VXSİ Dövlət Agentliyi və paralelçiliyə şərait yaradan Antiinhisar Dövlət Xidməti də baş verənlərin fərqindədir".