TƏDBİRLƏR

Azərbaycanın telekommunikasiya və poçt xidmətləri üzrə tənzimləyici qurumu İnformasiya Kommunikasiya Texnologiyaları Agentliyində (İKTA) istehsalat təcrübəsində olan tələbələr üçün Azərbaycanın beynəlxalq reytinqlərdəki mövqeyi ilə bağlı məlumatlandırıcı sessiya təşkil edilib.

Xeberler.az bildirir ki, Agentliyin İqtisadi təhlil şöbəsinin əməkdaşları tərəfindən keçirilən təlimdə Dünya Bankı Qrupunun “Business Ready” hesabatı, bu sənədin ölkəmiz və dünya iqtisadiyyatı üçün əhəmiyyətindən söz açılıb.

Bildirilib ki, “Business Ready” hesabatı dünya ölkələri üçün 3 mərhələdə açıqlanacaq və ümumilikdə təxminən 180 ölkəni əhatə edəcək. İlkin olaraq ötən il 50 iqtisadiyyat üzrə göstəricilər açıqlanıb. Bu il isə Azərbaycan da daxil olmaqla 58 ölkənin iqtisadi göstəriciləri üzrə məlumatları həmin sənəddə yer alacaq.

Məruzəçilərin sözlərinə görə, ölkəmizin bu və bu kimi beynəlxalq reytinqlərdə mövqeyinin yüksəldilməsi üçün Biznes mühiti və beynəlxalq reytinqlər üzrə Komissiya fəaliyyət göstərir. Həmin komissiyanın bir sıra işçi qrupları var və İKTA “İnternetə qoşulma və internet infrastrukturu” İşçi qrupunda təmsil olunur.

Təlim çərçivəsində təcrübəçilərin beynəlxalq reytinqlər, İKTA-nın funksiyaları və digər bu kimi məsələlərlə bağlı sualları cavablandırılıb.