İNTERNET

Son dövrlərdə evdə internet sürətinin ölçülməsi zamanı provayder adlarının fərqli görünməsi ilə bağlı müraciətlərin sayı artıb.

Xeberler.az bildirir ki, məsələ ilə bağlı İnformasiya Kommunikasiya Texnologiyaları Agentliyi (İKTA) açıqlama yayıb.

Bildirilib ki, istifadəçilər sürət ölçmə platformalarında, o cümlədən məşhur Speedtest xidmətində müqavilə bağladıqları internet xidmət təchizatçısının (İSP) adı əvəzinə fərqli provayder adlarının göstərildiyini müşahidə edirlər.

Agentliyin açıqlamasına görə, bu hallar əsasən texniki səbəblərlə bağlıdır. Belə ki, sürət ölçmə platformalarında göstərilən provayder adı istifadəçinin qoşulduğu IP ünvanının beynəlxalq qeydiyyat məlumatları və şəbəkənin “AS” (Autonomous System) identifikasiyası əsasında avtomatik müəyyən edilir. Bu səbəbdən bəzi hallarda istifadəçinin müqavilə bağladığı brend adı ilə texniki identifikasiya məlumatları arasında uyğunsuzluq yarana bilər.

Bununla yanaşı, İKTA qeyd edir ki, bəzi provayderlər üzrə brend təqdimatı ilə faktiki şəbəkə identifikasiyası arasındakı fərqlərin sistematik xarakter daşıması ehtimalı da araşdırılır. Xüsusilə IP resurslarının və şəbəkə strukturlarının məqsədli şəkildə bölüşdürülməsi nəticəsində ölçmə nəticələrinin fərqli brendlər altında toplanması və bunun bazar reytinqlərinə təsiri ciddi narahatlıq doğurur.

Agentlik vurğulayıb ki, belə halların təsdiqlənəcəyi təqdirdə bu cür yanaşmalar istehlakçıların düzgün məlumatlandırılması prinsiplərinə və sağlam rəqabət mühitinə zidd hesab olunacaq.

Hazırda məsələ ilə bağlı geniş texniki və hüquqi təhlillər aparılır. Araşdırmaların nəticələrindən asılı olaraq ictimaiyyətə əlavə məlumat veriləcək və qanunvericiliyə uyğun tədbirlər görüləcək.

İKTA internet xidmət təchizatçılarına bir daha xatırladıb ki, brend təqdimatı ilə faktiki şəbəkə identifikasiyası arasında uyğunsuzluq yaratmaq və ya ölçmə platformalarının nəticələrini manipulyasiya etməyə yönəlmiş hər hansı cəhdlər bazar etimadına ciddi zərbə vurur və qəbuledilməzdir.

Agentlik şəffaflıq, düzgün məlumatlandırma və ədalətli rəqabət prinsiplərinin qorunması istiqamətində nəzarət tədbirlərini davam etdirəcəyini bildirib.