İNTERNET

Azərbaycanın telekommunikasiya və poçt xidmətləri üzrə tənzimləyici qurumu olan İnformasiya Kommunikasiya Texnologiyaları Agentliyi (İKTA) qlobal internet performans qiymətləndirici platforması “Ookla”nın metodologiyası əsasında 2026-cı ilin yanvar ayı üzrə sabit genişzolaqlı internet provayderlərinin sürət göstəricilərini dərc edib.

Xeberler.az bildirir ki, İKTA tərəfindən hazırlanan “Azərbaycan üzrə Sabit Genişzolaqlı İnternet Xidmətləri üzrə Təhlil” (“Speedtest Intelligence” məlumatları əsasında) Agentliyin rəsmi internet səhifəsində yerləşdirilib.

Məlumata görə, təqdimat ötən ay olduğu kimi 3 kateqoriyalı sürət təsnifatı əsasında hazırlanıb və vizual formatda provayderlərin fərdi internet sürəti (Mbps) göstəriciləri açıqlanmayıb. Bunun əvəzinə, istifadəçilərin müqayisəni daha rahat aparması üçün “Ookla”nın rəsmi saytında əks olunan median internet sürət göstəriciləri əsasında provayderlər üç kateqoriyaya bölünüb.

Kateqoriyalara əsasən, 90 Mbps və daha yuxarı sürət təqdim edənlər “Yüksək sürət”, 50–89 Mbps aralığında olanlar “Orta sürət”, 1–49 Mbps aralığında olanlar isə “Aşağı sürət” kateqoriyasına daxil edilib.

İKTA bildirir ki, bu yanaşma istifadəçilərə bazarın ümumi mənzərəsini daha aydın və vizual şəkildə görməyə imkan verir. Kateqoriyalar “OOKLA Speedtest Intelligence” platformasından əldə edilən median ölçmə nəticələri əsasında formalaşdırılıb.

Qeyd olunur ki, “Ookla”nın rəsmi reytinq sisteminə yalnız geniş nümunə payına və tam metodoloji uyğunluğa malik provayderlər daxil edilsə də, İKTA tərəfindən təqdim olunan cədvəldə ölkədə fəaliyyət göstərən və “Ookla” tərəfindən qeydə alınan bütün provayderlər əhatə olunub.

Agentlik hesab edir ki, provayderlərin sürət kateqoriyalarına görə qruplaşdırılması ölkə üzrə internet performansının inkişaf dinamikasının daha aydın müşahidə edilməsinə imkan yaradır.

İKTA vurğulayır ki, bu cür analitik və vizual təqdimat modeli tənzimləyici fəaliyyətin dəstəklənməsi, provayderlər arasında sağlam rəqabətin təşviqi və istehlakçıların internet sürəti seçimi baxımından mühüm rol oynayır.

Agentlik “Ookla” ilə əməkdaşlığın davam etdiriləcəyini, internet keyfiyyəti üzrə milli indikatorların mütəmadi yenilənməsi və analitik monitorinqin genişləndirilməsinin planlaşdırıldığını bildirib.