EDUTECH

Xəbər verdiyimiz kimi, Təhsil nazirinin 08 iyun 2015-ci il tarixli 644 nömrəli əmrində tam orta təhsil səviyyəsində təmayülləşmənin tətbiqi nəzərdə tutulub.

Diqqət çəkən və birmənalı qarşılanmayan isə ondan ibarətdir ki, bu əmrlə təsdiq edilən və  pilot olaraq seçilmiş  50 orta ümumtəhsil müəssisəsində İnformatika fənninin ləğvi  də nəzərdə tutulub.

Belə ki, adı çəkilən əmrlə bir neçə, o cümlədən texniki və riyazi təmayülləşmə üzrə istiqamət müəyyən olunub və bu təmayüllər üzrə tədris olunacaq fənlərin siyahısına İnformatika daxil edilməyib.
Bütün bunlar isə ictimaiyyət tərəfindən  birmənalı qarşılanmayıb.

Bu istiqamətdə müzakirələrin getdiyi bir zamanda məlum olub ki, həmin adıçəkilən əmr Təhsil Nazirliyinin rəsmi saytından götürülüb. Hazırda adıçəkilən əmri rəsmi saytdan tapmaq mümkün deyil.
Qeyd edək ki, bu problem Təhsil Nazirliyinin saytı yenilənəndən sonra baş verib.

Rəsmi sənədin saytdan silinməsinin nə dərəcədə doğru olmasına aydınlıq gətirməyə çalışdıq.

Məsələ ilə bağlı Azərbaycan İnternet Forumunun prezidenti Osman Gündüz  Xeberler.az-a bildirib ki, Təhsil Nazirliyinin saytı yeniləndikdən sonra adıçəkilən Əmrə rast gəlinmir.

“Bu, əlbəttə, yolverilməz bir haldır. Mən özüm yenidən lazım olduğuna görə bir neçə dəfə  cəhd etdim ki, bu sənədi Təhsil nazirliyinin yeni saytından əldə edim. Təəssüf ki, bütün cəhdlərim uğursuz oldu. Şübhə yoxdur ki, əmr saytdan yığışdırılıb. Yeri gəlmişkən qeyd edim ki,  rəsmi saytın köhnə versiyasındakı bu əmrə yönləndirilən linklərdə hazırda başqa məlumat açılır. Bu isə, əlbəttə, "İnformasiya əldə edilməsi haqqında" qanunun  və hüquqi sənədlərin dərc edilməsi və açıqlanması ilə bağlı qanunvericiliyin tələblərinin kobudcasına pozulması deməkdir”.

Onun sözlərinə görə, baxmayaraq ki həqiqətən Təhsil Nazirliyinin rəsmi saytının yeni versiyası əvvəlkinə nisbətən daha uğurlu alınıb, amma saytın informasiya təminatında, görünür ki, problemlər var.

Osman Gündüz problemi saytın yenilənməsi  zamanı baş verən  xətalarla da əlaqələndirib:

“Ola bilər ki, bu, məqsədyönlü şəkildə də çıxarılsın. Amma o da mümkündür ki, bu hal yeni sayt hazırlanarkən məlumat bazalarının inteqrasiyası prosesində baş verən xəta, yenilənmə ilə bağlı olsun”.

Forum rəhbəri qeyd edib ki, istənilən halda ictimai əhəmiyyət kəsb edən, vətəndaşın istəyindən asılı olmayaraq açıqlanması məcburi olan bir sənədin  nazirliyin saytından yoxa çıxması xoşagələn hal deyil.

Osman Gündüz bu əmrin İnformatikanın ən azı texniki və riyazi təmayüllər üzrə tədrisinin bərpası baxımından yenidən işlənməsi səbəbilə yığışdırılmasını da istisna etməyib.

O, təmayülləşmə ilə bağlı prinsiplərə keçid,  bilik və bacarıq səviyyəsi  müxtəlif olan, hansısa sahədə daha da fərqlənən şagirdlərin istedadlarının, potensial imkanlarının, meyil və maraqlarının reallaşmasına imkanlar yaratması baxımından nazirin əmrinin düzgün yanaşma olduğunu da diqqətə çatdırıb.

Mirvari Nəcəf