İnformatika problemini hansı qurum həll etməlidir?

11-08-2015 / 14:37

Tanınmış pedaqoq, İnformatika üzrə olimpiadalara hazırlıq işlərinin rəhbəri Ramin Mahmudzadə İnformatika fənninin tədrisi, fənnə münasibət və digər məsələlərlə bağlı Tələbə Qəbulu üzrə Dövlət Komissiyasının sədri Məleykə Abbaszadəyə açıq məktub yazıb.

Xəbərlər-in verdiyi məlumata görə, həmin məktubda qeyd edilir ki, bu gün məktəb İnformatikasının inkişafına əsas maneə törədən amillərdən biri də ali məktəblərin qəbul imtahanlarına İnformatikadan sualların daxil edilməməsidir.

Bu məsələ ekspertlər tərəfindən birmənalı qarşılanmayıb. Belə ki,  İnformatika probleminin həllinin başqa qurumlardan asılı olduğu bildirilir.

Xeberler.az məsələ ilə  bağlı Azərbaycan İnternet Forumun prezidenti Osman Gündüzdən fikirlərini öyrənib.

Osman Gündüz İnformatikaya qarşı diqqətin cəlb edilməsi baxımından müraciəti müsbət dəyərləndirsə də  problemin həlli baxımından ünvanın düzgün seçilmədiyini qeyd edib.

“Məncə, burada nəsə anlaşımazlıq var. İndiki məqamda TQDK-ya müraciət etmək nə dərəcədə məntiqlidir ?. Axı hazırda Təhsil Nazirliyi İnformatika fənninin ləğvi xəttini götürüb. Artıq rəsmi əmrlə 50 məktəbdə İnformatika fənni ləğv edilib. Belə olan halda Məleykə xanıma İnformatikadan gələcəkdə imtahan salınmasını tələb etmək, fikrimcə, düzgün yanaşma olmazdı. Axı bu necə ola bilər ki, təhsilə cavabdeh qurum fənni ləğv etsin, təhsilə qiymət verən qurumdan isə imtahan tələb edilsin. Ramin müəllimə bütün hörmətlərimə, İnformatika üçün çalışmalarına baxmayaraq bu addımı məntiqli hesab etmirəm".

Osman Gündüz qeyd edib ki, Təhsil Nazirliyinin həmin məşhur ləğvetmə əmrindən öncə bəlkə də TQDK-ya  belə bir müraciət etmək düzgün addım kimi qiymətləndirilə bilərdi və ya Nazirliyin ləğvetmə əmrindən öncə adıçəkilən problemlə bağlı hər iki quruma birgə müraciət oluna bilərdi:

Forum rəhbəri xatırladıb ki,  Təhsil Nazirliyinin İnformatika fənninin ləğvetmə əmrindən öncə onun TQDK-ya bununla bağlı müraciətləri  olub.  Onun sözlərinə görə,  TQDK hələ o zaman orta məktəblərdə İnformatikanin tədrisinin keyfiyyətsiz olmasını əsas gətirərək İnformatikadan imtahan daxil edilməsini əsaslı saymırdı:

"Odur ki, indiki halda İnformatika probleminin həllinin, bununla bağlı müraciətin bir ünvanı var, o da Təhsil Nazirliyidir. Hansı ki bu qurum İnformatika ilə bağlı siyasətini dəyişməlidir, İnformatikanın tədrisini yaxşılaşdırmalıdır".

Osman Gündüz hesab edir ki,Təhsil Nazirliyinin bu addımlarından sonra   TQDK –nın İnformatika ilə bağlı gələcəkdə imtahan salınacağı mesajı da problemin həllinə kömək edə bilər.

Təhsil Nazirliyinin 2015-ci il 8 iyun tarixli 644 saylı əmri ilə 50 məktəbdə  İnformatika fənni ləğv edilib.

Diqqət çəkən məqam həm də ondan ibarətdir ki, adıçəkilən əmr Təhsil Nazirliyinin saytından yığışdırılıb.

Xatırladırıq ki, 2019-cu ildə Beynəlxalq İnformatika Olimpiadası Bakıda keçiriləcək.

 Ruhəngiz Muradova 

 

ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.