TƏDBİRLƏR

İsveçrə Milli Elm Fondu, İsveçrə və Şərqi Avropa arasında elmi əməkdaşlıq layihəsi çərçivəsində, gələn il İsveçrənin Cenevrə şəhərində keçiriləcək Augmented Human 2016 elmi konfransında iştirak üçün səfər qrantları ayırır.

Bu məlumatı Xeberler.az-a konfransın təşkilat komitəsinin üzvü, hazırda Cenevrə universitetində elmi tədqiqat ilə məşğul olan həmyerlimiz Emin Hüseynov bildirib.

Qeyd edək ki, Augmented Human konfransı artıq yeddinci dəfədir keçirilir.

Konfransın əsas mövzusu texnologiyanın köməyi ilə insan imkanlarının genişləndirməsidir. Bu sahəyə virtual reallıq (virtual realty), geyilən texnologiyalar (wearable computing), texnologiya imkanları ilə genişləndirilmiş idman (augmented sports) və digər mövzular aiddir.

Konfrasda iştirak üçün texnologiyanın köməyi ilə insan imkanlarının genişləndirməsi mövzusunda elmi məqalələrin təqdim olunması mütləqdir.

Məqalələr aşağıdakı kateqoriyalarda təqdim oluna bilər:

1. Tam mətnli məqalələr – 8 səhifə

2. Qısa məqalələr: 4 səhifə

3. Nümayiş layihələri: 2 səhifə və konfransda nümayiş stendi

4. Plakatlar: 2 səhifə və konfransda plakatların yerləşdirilməsi

5. Tələbə müsabiqəsi 

Konfransa qəbul olunan məqalələrin müəlliflərinin İsveçrəyə səfər xərclərinin İsveçrə və Şərqi Avropa arasında elmi əməkdaşlıq layihəsi çərçivəsində verilən qrantlardan ödənilməsi imkanı mövcuddur.

Layihədə Azərbaycan ixtiraçıları üçün verilən qrantların maksimal məbləğı 2000 isveçrə frankı təşkil edəcək (bir nəfər üçün).

Maraqlananlar , daha ətraflı məlumat üçün konfransın rəsmi saytına  və ya  emin (a) huseynov. com elektron ünvanına müraciət edə bilərlər.

 Mirvari Nəcəf