SÜNİ İNTELLEKT VƏ DATA

Elm və Təhsil Nazirliyinin Fizika İnstitutunda “MetaWay” MMC-nin “Global Research Project” layihəsi əsasında Şuşa şəhərində reallaşmış Qlobal Tədqiqat Konfransı çərçivəsində keçirilmiş “Daha yaxşı gələcək üçün süni intellekt” adlı beynəlxalq tədbirin davamı olaraq “Süni intellektin universitetlər və elmi-tədqiqat institutları üçün yaratdığı imkanlar” mövzusunda hesabat seminarı təşkil olunub.

Xeberler.az bildirir ki, bu barədə institutdan məlumat verilib.

İnstitutun elmi innovasiyalar və xarici əlaqələr şöbəsinin rəhbəri Rüstəm Rüstəmov müzakirə olunan mövzunu seminar iştirakçılarının diqqətinə çatdırıb. Bildirib ki, “Global Research Conference Shusha 2025”in təşkilinin bütün mərhələlərində Fizika İnstitutunu təmsil edən əməkdaşlar bir komanda olaraq inzibati, elmi və təşkilati məsələlərdə fəal iştirak ediblər. Xüsusilə elmi fəaliyyət istiqamətində mövzuların seçilməsi və təqdimi, eləcə də fərdi qaydada komanda üzvlərinin konfransda müxtəlif mövzular ətrafında olan müzakirələrdə aktiv iştirakı ümumilikdə konfransın işinin və Fizika İnstitutunu konfrans çərçivəsində yüksək səviyyədə təqdim olunmasına şərait yaradıb. Qeyd edib ki, konfransda yerli və xarici qonaqlarla institutda birgə elmi əməkdaşlıq haqqında müzakirələr aparılıb.

Seminarda institutun Elmi resurslar və rəqəmsal informasiya şöbəsinin rəhbəri Orxan Əliyev, Materialşünaslıq laboratoriyasının dosenti Suma Hüseynova və Yarımkeçiricilərdə və yarımkeçirici nanostrukturlarda köçürmə hadisələri laboratoriyasının dosenti Aytən Əliyevanın məruzələri dinlənilib.

Daha sonra görülmüş işlər və mövzu ətrafında müzakirələr, eləcə də fəaliyyət planları haqqında ətraflı fikir mübadiləsi aparılıb.