MOBİL RABİTƏ

Xəbər verdiyimiz kimi, Rabitə və yüksək texnologiyalar naziri Əli Abbasov IV İslam Həmrəyliyi Oyunlarının telekommunikasiya, internet, mobil və yayım xidmətləri ilə təmin edilməsi haqqında əmr imzalayıb.

Əmrə əsasən, "IV İslam Həmrəyliyi Oyunlarının 2017-ci ildə Bakı şəhərində keçirilməsi üzrə Təşkilat Komitəsinin yaradılması haqqında" Azərbaycan Prezidentinin 18 sentyabr 2015-ci il tarixli 1413 nömrəli Sərəncamına uyğun olaraq, IV İslam Həmrəyliyi Oyunlarının yüksək səviyyədə keçirilməsi və Oyunların keçiriləcəyi stadionlar, arenalar, idman mərkəzlərinin keyfiyyətli, fasiləsiz və dayanıqlı telekommunikasiya, internet, mobil və yayım xidmətləri ilə təmin ediləcək.

Xeberler.az-ın məlumatına görə, Bakcell şirkətinin baş icraçı direktoru Riçard Şirer nazirin bu əmri ilə bağlı jurnalistlərə açıqlama verib.

İcraçı direktor vurğulayıb ki, IV İslam Həmrəyliyi Oyunları ərəfəsində bizi heç bir problem gözləmir. Riçard Şirer bildirib ki, şirkət olaraq Oyunlara yüksək səviyyədə hazırlaşacağıq:

“Avropa Oyunları üçün hazırlıq hansı səviyədə təşkil olunubsa, IV İslam Həmrəyliyi Oyunlarına da həmin səviyyədə hazırlaşacağıq. Müqavilələr bağlanacaq, keyfiyyətli xidmət təmin olunacaq. Artıq bizim sistemimiz sınaqdan keçib. Əminliklə deyə bilərik ki, İlk Avropa Oyunlarında olduğu kimi İslam Həmrəyliyi Oyunlarında özümüzü doğruldacağıq. Bu Oyunlar ərəfəsində bizi heç bir problem gözləmir”

Mirvari Nəcəf