PROQRAMLAR

“Dayaq” mükafatının təltifetmə mərasimi artıq ölkəmizin işgüzar tədbirlər təqviminin ayrılmaz hissəsinə çevrilib. Bu təşəbbüsü 3 il əvvəl irəli sürərkən əsas məqsədimiz nailiyyətləri ilə seçilən sahibkarları təqdir etmək, onların timsalında sahibkarlıq hərəkatını daha da genişləndirmək və dövlətin sahibkarlara olan dəstəyini bir daha nümayiş etdirmək idi.

Xeberler.az məlumat verir ki, bunu Kiçik və Orta Biznesin İnkişafı Agentliyinin (KOBİA) sədri Orxan Məmmədov “Güc biznesdədir” devizi ilə keçirilən “Dayaq” mükafatının təqdim olunması mərasimində deyib.

Onun sözlərinə görə, KOB sektoru çoxşaxəli, dinamik bir sahədir və bu sahənin inkişafı dövlət qurumları, tənzimləyici orqanlar və biznes ictimaiyyətinin koordinasiyalı fəaliyyətini tələb edir.

“Bu gün bu zalda sahibkarlarla yanaşı, bir çox dövlət qurumlarının nümayəndələri də iştirak edirlər. Fürsətdən istifadə edərək, KOBİA ilə sıx əməkdaşlığa və sahibkarlığın inkişafına verdikləri dəstəyə görə onlara təşəkkürümü bildirirəm. Birgə fəaliyyətimizin real nəticəsi isə statistik göstəricilərdə aydın görünür. 2018-ci ildən bu günə qədər KOB subyektlərinin sayı təxminən 74 faiz artaraq 424 minə çatıb. KOB-lar tərəfindən yaradılan əlavə dəyər 10 milyard manatdan 21 milyard manata yüksəlib. Ötən il KOB-ların dövriyyəsi 48 milyard manatı keçərək qeyri-neft dövriyyəsinin 37 faizini təşkil edib. Bu ilin sentyabrında açıqlanan Qlobal İnnovasiya İndeksində Azərbaycan “Sahibkarlıq siyasəti və mədəniyyəti” göstəricisi üzrə 139 ölkə arasında 2-ci yerdə qərarlaşıb. Eyni zamanda, xarici kapitallı şirkətlər arasında aparılmış sorğuya əsasən, KOBİA sosial-iqtisadi inkişafın dəstəklənməsi baxımından dövlət qurumları arasında lider kimi qiymətləndirilib. KOBİA olaraq biz daxili idarəetmənin keyfiyyətinə də xüsusi önəm veririk və bu istiqamətdə həyata keçirdiyimiz ardıcıl tədbirlər sahibkar məmnuniyyətinin artırılmasına xidmət edir”, - deyə Orxan Məmmədov qeyd edib.

KOBİA sədri vurğulayıb ki, rəqəmsallaşma sahəsində də ardıcıl addımlar atılır, e-KOB evi platforması beta versiyada istifadəyə verilib və sahibkarlara biznesin planlaşdırılmasından inkişaf mərhələsinədək geniş elektron xidmətlər təqdim edilir: “Eyni zamanda, daha çox dövlət xidmətinin bu platformaya inteqrasiyası istiqamətində işlər davam etdirilir. Regionlarda sahibkarlığın inkişafı bizim üçün xüsusi prioritetdir. Bu il Füzuli və Kəlbəcərdə KOB Dostu ofisləri istifadəyə verilib, bununla da Qarabağ bölgəsində KOB Dostu şəbəkəsinin sayı 5-ə çatıb. Şuşa şəhərində KOB Evinin fəaliyyəti təmin olunub, Gəncə KOB evi isə yaxın vaxtlarda istifadəyə veriləcək. Bununla yanaşı, KOB İnkişaf Mərkəzləri tərəfindən təqdim olunan pulsuz təlim və konsaltinq xidmətləri, qrant proqramları, Startap şəhadətnamələri, iri ticarət şəbəkələrinə çıxış, eləcə də yerli və beynəlxalq sərgilərdə iştirak üzrə dəstək mexanizmləri sahibkarların istifadəsindədir”.