Microsoftun data-mərkəzlər üzrə direktoru Apple şirkətinə keçib
18-04-2011
17:25
Apple şirkəti Microsoft korporasiyasının data-mərkəzlər üzrə direktoru Kevin Timmonsu öz sıralarına cəlb edə bilib. Menecerin Microsoft-u tərk etməsi rəsmi təsdiqlənib.
K. Timmonsun yeni iş yerində hansı vəzifəni icra edəcəyi hələ bildirilmir.
2010-cu ilin sonunda Apple şirkətinin data-mərkəzlər üzrə direktoru Olivye Sanş vəfat etmişdir. Ehtimal var ki, K. Timmons məhz onu əvəz edəcək, lakin bəzi mənbələrin məlumatına görə, Apple artıq bu mövqeyi əməkdaşlarının birinə həvalə edib.
Bu il Apple ABŞ-ın Şimali Karolina ştatında böyük data-mərkəz açmağı planlaşdırır. Mərkəzin bazasında şirkətin yeni “bulud” servisi təşkil edəcəyi gözlənilir, lakin bu layihənin detalları hələ açıqlanmayıb. Bununla yanaşı istisna deyil ki, Apple “bulud” texnologiyası üzrə musiqi saxlanılması və dinlənilməsi servisi təqdim edəcək və Amazonla bu sahədə rəqabət aparacaq.
