Milli peykin orbitə buraxılması reallaşır
01-08-2008
08:32
Rabitə və İnformasiya Texnologiyaları Nazirliyində (RİTN) Azərbaycanın milli peykinin orbitə buraxılması ilə bağlı araşdırmalar aparılır. İşlər əsasən orbital mövqeyin əldə olunması və peykin istehsalı ilə bağlı şirkətlərdən daxil olan təkliflərin araşdırılması istiqamətində təşkil edilir. Nazirlikdən AzərTAc-a bildirmişlər ki, artıq bu mövqeyin ayrılması üçün Beynəlxalq Telekommunikasiya İttifaqının (BTİ) tələb etdiyi texniki məlumatlar hazırlanmışdır. Milli peyk layihəsinin reallaşması, ilk növbədə, ölkəmizin digər peyklərdən asılılığını aradan qaldıracaq, ölkə ərazisində radio və TV kanallarının yayımı, ucuz rabitə xidmətlərinin, yüksəksürətli internetin və multimedia xidmətlərinin təşkili, dağlıq ərazilərimizdə keyfiyyətli telekommunikasiya və informasiya xidmətlərinin göstərilməsi, təhlükəsiz rabitə əlaqələrinin yaradılması və digər imkanların əldə olunmasına şərait yaradacaqdır.
