RƏQƏMSAL DÜNYA

2010-cu ildə İKT və poçt sektorunda gəlirlər 2009-cu ilə nisbətən 31,3% artaraq 1158,9 milyon manata çatıb.

Rabitə və İnformasiya Texnologiyaları Nazirliyindən verilən xəbərə görə, il ərzində regionların telekommunikasiya şəbəkəsinin tam elektronlaşması başa çatdırılıb. Ölkənin ən ucqar yaşayış məntəqələrində müasir tipli elektron ATS-lərin qurulması təmin edilib. Ötən il mobil abunəçilərin sayı təxminən 1 342 880 nəfər artaraq 9 100 000 nəfərə çatıb. Beləliklə də ölkədə “Hər 100 nəfərə 100 mobil abunəçi” layihəsi icra edilib. Dünya Bankının maliyyə dəstəyilə Respublikada həyata keçirilən “Maliyyə xidmətlərinin inkişafı” layihəsi 2010-cu ildə uğurla başa çatıb. Yeni bank-maliyyə xidmətlərinin göstərilməsinə başlanılıb. Respublikanın bütün ərazisini əhatə edən “AzDataCom\" şəbəkəsinə ölkənin əksər rayonlarının qoşulması təmin edilib. 2010-cu ildə Azərbaycanın ilk telekommunikasiya peykinin orbitə buraxılması işləri çərçivəsində orbital mövqedən istifadə, peykin istehsalı və orbitə çıxarılması üzrə müqavilələr imzalanıb. Bakı və Abşeron yarımadası ilə yanaşı, Gəncə, Lerik və ətraf rayonlarda rəqəmsal televiziyanın yayımına başlanılıb.

 Beləliklə, respublika əhalisinin təqribən 50 faizinin yaşadığı ərazilərdə rəqəmsal televiziya yayımının göstərilməsi imkanı təmin edilib. Ötən il ərzində internetin qiymətləri təqribən 50% aşağı düşüb. Həmçinin, 2010-cu ildə “Xalq kompüteri” layihəsinin yeni mərhələsinə başlanılıb.