Milli Teleradio şurasının səlahiyyətləri artırılarsa nə ola bilər?

09-10-2009 / 17:10

Zeynal Məmmədli: “Bu, bizi geriyə aparacaq”

Xeberler.az bildirir ki, Milli Teleradio Şurasının sədri Nuşirəvan Məhərrəmli rəhbəri olduğu qurumun səlahiyyətlərinin artırılmasını təklif edib. Sözügedən təklif Prezident Administrasiyasının rəhbəri Ramiz Mehdiyevin telekanallarla bağlı tənqidi məqaləsinin müzakirəsinə həsr olunan tədbirlərdə də səslənib. Maraqlıdır, bu təklif həyata keçsə, bunun elektron mediaya nə kimi ziyanı və ya xeyri ola bilər? MTRŞ-in əlinə administrativ cəza metodlarının verilməsi problemi həll edə biləcəkmi?Media eksperti Zeynal Məmmədli bildirdi ki, belə bir təklifin gündəmə gəlməsi hələ də sovet adamı şüurunu içimizdən çıxara bilməməyimizin nəticəsidir.

Onun sözlərinə görə, bu cür adamlar səlahiyyətlərini artırmaqla televiziyalardakı problemləri həll etməyin mümkünlüyünə inanırlar. Müsahibimiz inzibati idarəetməni seçmək, cəzaları artırmaqla söz və mətbuat azadlığının məhdudlaşdırılacağına inanır: “Milli Teleradio Şurası kimi təcrübəsiz bir quruma hakim statusunun verilməsi doğru deyil. Onun səlahiyyətlərinin artırılması bizi geriyə doğru aparacaq. Sərbəst bazar yoxdursa, bəzi məsələlər necə müəyyənləşəcək? Bizim televiziya bazarı nə qədər qapalı olsa da, insanlar buna öz reaksiyasını göstərdi: onları yox, peyk kanallarını seçdi. Bəs onda bu reklamlar həmin kanallara necə gəlib çıxıb? Bazar cəzalandıra bilərsə, Milli Teleradio Şurasının cəzasına nə ehtiyac var?”

Z.Məmmədli bu gedişlə MTRŞ-ə “xalq artisti” statusunu paylama səlahiyyəti veriləcəyinə də inanır. Müsahimiz bu məsələdə MTRŞ-in özünü Türkiyədəki analoji qurum - Radyo Televizyon Üst Kurulu (RTÜK) ilə müqayəsi etməsini də yersiz sayır. Onun sözlərinə görə, Türkiyədə bizdəkindən qat-qat artıq sayda televiziya var və onlarçün normal bazar şərtləri yaranıb: “Əsas da odur ki, onların həmin para cəzasını kompensasiya etmək imkanı var. Bizdə isə sərbəst bazar olmayınca bu problemdən çıxış yolu da olmayacaq”.

 

Xeberler.az


ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə