Mobil telefonlar meksikalılar üçün portmanatı əvəz edəcək
28-08-2008
11:23
Tezliklə, meksikalılar portmanatlarını evdə qoyub mağazalarda, restoranlarda, taksilərdə mobil telefonun köməyi ilə pul ödəyəcəklər.
Meksikanın yerli KİV-nin dediyinə görə, bu fikir mobil əlaqə operatorları tərəfindən irəli sürülüb. Onlar xidmətin reallaşmasında yerli banklarla əməkdaşlıq etmək niyyətindədirlər.
Yeni xidmətin təşkilatçılarından biri, Roberto Rodriqesin sözlərinə görə, telefon sahibi ödəniş etmək üçün lazım olan nömrəyə öz bank hesabının nömrəsini göstərən mesaj göndərməlidir.
Hazırda bu xidmətə ölkənin bütün böyük bankları qoşulub. Yaxınlarda Latın Amerikasının baş mobil operatoru America Movil's-in də xidmətə qoşulacağı gözlənilir.
Yeni xidmət tezliklə fəaliyyətə başlayacaq və bütün Amerikada işləyən ilk xidmət olacaq. Hələlik isə nəqliyyat, ticarət işlərində mobil telefonla ödəniş etmək yalnız Yaponiyada mümkündür.
