“Azerfon” Azərbaycan İnvestisiya Sammitini dəstəkləyir
Martın 3-də Bakıda Azərbaycan İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (Azpromo) və “Euroconvention Conferences” şirkətinin təşkilatçılığı və Azerfon şirkətinin dəstəyi ilə Azərbaycan İnvestisiya Sammiti başlayıb.
Tədbirdə Azərbaycandan 130, ABŞ, Böyük Britaniya, İtaliya, Fransa, Rusiya, və digər ölkələrdən 40-dan çox rəsmi şəxs və iş adamları iştirak edir.
Tədbirdə çıxış edən Rabitə və İnformasiya Texnologiyaları nazirinin müavini Elmir Vəlizadə bildirib ki, ölkədə telekommunikasiya sektorunun inkişafı, bu sahənin investisiya imkanları və gələcəyə yönəlik layihələr üçün münbit şərait yaradılıb.
Azerfon şirkətinin baş direktoru Yurgen Pitz bildirib ki, “Telekommunikasiya sektorunda Azerfon şirkəti öz inkişaf yolunda quruculuq mərhələsini müvəffəqiyyətlə başa vurub və hazırda təkmilləşdirilmiş şəbəkəyə malik olaraq müştəri bazasının artırılması üzərində çalışır. Azərbaycan MDB regionunda İKT sahəsi üzrə ən sürətli inkişaf göstəricilərinə malikdir. Belə inkişaf templərini nümayiş etdirən Azerfon MMC-nin də sözsüz ki, ölkə iqtisadiyyatının inkişafında payı vardır. Azerfon özünün innovativ məhsul və xidmətləri ilə ölkənin telekommunikasiya sahəsinə bir canlanma gətirdi. Azerfon ilk dəfə olaraq danışıqların tarifikasiyasını manatla apardı, dünya mobil rabitəsinin nəhəngi Vodafonu Azərbaycan gətirdi, ən qabaqcıl rouminq xidmətləri və ilk dəfə olaraq 3G texnologiyasını tətbiq etdi. Biz bununla fəxr edirik”, - deyə, o qeyd edib.
Sammitdə “Dünyada sürətlə inkişaf edən sahələrdən biri kimi alternativ enerji bazarı” və “Kənd təsərrüfatı və qida sənayesində açılan dayanıqlı biznes imkanları” mövzularında məruzələr dinlənilib, daha sonra ölkədə telekommunikasiya sektorunun inkişafı, bu sahənin investisiya imkanları, nəqliyyat və yol infrastrukturu ilə bağlı müzakirələr aparılıb.
Tədbirə olan marağın özü Azərbaycanda xarici investorların fəaliyyəti üçün hər cür şəraitin yaradılması, ölkəmizin uğurlu investisiya məkanı kimi tanınması kimi dəyərləndirilir. İnvestorların məqsədi Azərbaycanı öyrənmək və buradakı investisiya mühiti barədə məlumat almaqdır.
