Qlobal şəbəkə keyfiyyətinin qiymətləndirilməsi üzrə ixtisaslaşmış Ookla şirkəti mart ayı üzrə “Speedtest Global Index” hesabatını açıqlayıb.
Xeberler.az bildirir ki, hesabata əsasən, Azərbaycanda sabit genişzolaqlı internetin median sürəti 91,37 Mb/s, mobil internetin median sürəti isə 95,43 Mb/s təşkil edib.
Fevral ayı ilə müqayisədə sabit genişzolaqlı internetin sürəti 0,10 Mb/s (0,11%), mobil internetin sürəti isə 0,48 Mb/s (0,51%) artıb.
İllik müqayisədə isə daha ciddi artım qeydə alınıb. Belə ki, sabit genişzolaqlı internetin sürəti 17,75 Mb/s (24,11%), mobil internetin sürəti isə 20,81 Mb/s (27,89%) yüksəlib.
Mütəxəssislər bu dinamikanı ölkədə rəqəmsal transformasiya proseslərinin sürətlənməsi, elektron xidmətlərə tələbatın artması, eləcə də distant iş və təhsil imkanlarının genişlənməsi ilə əlaqələndirirlər.
Qeyd olunur ki, əldə olunan nəticələr Azərbaycanın qlobal internet reytinqlərində mövqeyinin gücləndiyini göstərir.
