Azərbaycanın telekommunikasiya və poçt xidmətləri üzrə tənzimləyici qurumu olan İnformasiya Kommunikasiya Texnologiyaları Agentliyi (İKTA) sabit genişzolaqlı internet provayderlərinin 2026-cı ilin mart ayı üzrə sürət göstəricilərini dərc edib.
Xeberler.az məlumat verir ki, hesabat qlobal internet performansını qiymətləndirən Ookla şirkətinin metodologiyası əsasında, “Speedtest Intelligence” məlumatları istifadə olunmaqla hazırlanıb və qurumun rəsmi internet səhifəsində yerləşdirilib.
“Sabit genişzolaqlı internet xidmətləri üzrə Mart 2026 Təhlili” adlı hesabat dörd kateqoriyalı sürət təsnifat modeli əsasında təqdim olunub. Bu modelə görə, internet xidmətləri çox yüksək (150+ Mbps), yüksək (101–149 Mbps), orta (50–100 Mbps) və aşağı (1–49 Mbps) sürət kateqoriyalarına bölünür.
İKTA qeyd edib ki, bu yanaşma istifadəçilərə bazarda fəaliyyət göstərən provayderlərin performansını daha aydın və müqayisəli şəkildə qiymətləndirməyə imkan yaradır.
Mart ayı üzrə ölkə göstəricilərinə əsasən, sabit genişzolaqlı internetin median endirmə (download) sürəti 91,94 Mbit/s, median yükləmə (upload) sürəti 93,43 Mbit/s, median gecikmə (latency) isə 4 ms təşkil edib.
Agentlik hesab edir ki, bu cür analitik təqdimat modeli telekommunikasiya bazarında şəffaflığın artırılmasına, provayderlər arasında sağlam rəqabətin təşviqinə və istifadəçilərin daha məlumatlı seçim etməsinə mühüm töhfə verir.
İKTA əlavə edib ki, Ookla ilə əməkdaşlıq davam etdiriləcək, ölkə üzrə internet performans göstəricilərinin monitorinqi və analitik təhlillərin genişləndirilməsi planlaşdırılır.
