TƏHLİL VƏ RƏYLƏR

Xüsusi Rabitə və İnformasiya Təhlükəsizliyi Dövlət Xidmətinin (XRİTDX) Kompüter İnsidentlərinə qarşı Mübarizə Mərkəzinin İdarə Heyətinin üzvü olduğu İslam Əməkdaşlıq Təşkilatının (İƏT) CERT komandalarının birliyi olan “OIC-CERT” təşkilatı kibertəhlükəsizlik sahəsində beynəlxalq əməkdaşlığı təşviq etmək məqsədilə “OIC-CERT qlobal kibertəhlükəsizlik mükafatı”nı təqdim edir.

Xeberler.az məlumat verir ki, Kompüter İnsidentlərinə qarşı Mübarizə Mərkəzi bu barədə məlumat yayıb.

Məlumatda qeyd olunub ki, “OIC-CERT Mükafatı” dünyanın hər yerindən, ölkə və ya regionundan asılı olmayaraq, rəqəmsal aləmi təşviq etməklə cəmiyyətin rifahının yüksəldilməsinə töhfə verən bütün innovativ kibertəhlükəsizlik layihələrini tanıyır. Əlavə məlumatı https://www.oic-cert.org/en/awards.html saytında əldə etmək mümkündür.

Mükafat bir və ya bir neçə əsas sahəni əhatə edən seçilmiş layihə(lər) üçündür, lakin bunlarla da məhdudlaşmır:

a. İnsanlar (bacarıqların artırılması, məlumatlılıq, tədris və öyrənmə),

b. Proses (siyasət, idarəetmə, normalar və təşəbbüskarlıq) və/və ya

c. Texnologiya (sistemlər, həllər və innovasiyalar)

Yuxarıda qeyd olunanlara əsasən, Mükafat Komitəsi “OIC-CERT Qlobal Kibertəhlükəsizlik Mükafatı”na müraciət üçün çağırış edir. Müraciətlər dövləti, özəl sektoru, beynəlxalq və regional təsisatları, vətəndaş cəmiyyətləri və akademiyaları təmsil edən qurumlar üçün açıqdır. Bu təşəbbüs cəmiyyətin rifahına töhfə verən innovativ kibertəhlükəsizlik layihələrinin işlənib hazırlanması və həyata keçirilməsində ideyaları və uğur hekayələrini bölüşmək üçün dünyanın hər yerindən müraciətlərin təşviq edilməsi üçün hazırlanıb.

Qalib namizəd 1000 ABŞ dolları məbləğində pul mükafatı alacaq. Bütün namizədlərdən https://www.oic-cert.org/en/globalaward/form ünvanına keçid edib iştirak formasını yükləyərək doldurmaq və daha sonra [email protected] elektron poçtuna göndərmələri xahiş olunur. Müraciət üçün son tarix 2023-cü il avqustun 31-dək olacaq.