Personal superkompüter təqdim olunub
19-11-2008
17:14
Nvidia şirkəti Nvidia Tesla hesablama sistemləri bazasında yığılmış personal superkompüter təqdim edib. Xarici görünüşdən adi sistem blokdan fərqlənməyən yeni kompüterin məhsuldarlığı dörd teraflopsdan (saniyədə trilyon əməliyyat) bir qədər azdır. Onun əsasını hər biri bir qrafik və 240 axın prosessordan ibarət dörd Tesla C1060 sistemi təşkil edir.
Nvidia Tesla bazasında kompüterlərin yığılmasını bir sıra ABŞ, Avropa və Yaponiya şirkətləri həyata keçirir. Bunların arasında Dell, AMAX, Asus, Lenovo kimi istehsalçıları qeyd etmək olar. Yeni personal kompüterin qiyməti isə 9995 ABŞ dolları təşkil edir, Lenta yazır.
Qeyd edək ki, bundan əvvəl superkompüterin ucuz variantı Microsoft və Cray şirkətləri tərəfindən təqdim olunmuşdur. Cray CX1 adlanan bu kompüter alıcının istəyindən asılı olaraq Nvidia Tesla ilə təchiz oluna bilər. Cray CX1-in qiyməti 25 mindən 60 min dollaradək təşkil edir.
mənbə: mincom.gov.az
