Şərqi Afrikaya optik lif rabitə xətləri çəkiləcək
Cari ilin oktyabr ayında Şərqi Afrikaya ilk optik lif rabitə xətləri çəkiləcək. 15 000 kilometr uzunluğunda optik lif kabelinin çəkilməsi 600 milyon ABŞ dollarına başa gələcək. Bu məbləğin əsas hissəsinin Afrika investorları tərəfindən ödənilməsi nəzərdə tutulub. Hazırda bu regionun əhalisi İnternet şəbəkəsinə olduqca bahalı peyk rabitəsi vasitəsi ilə qoşulur. Məsələn, Keniyada aylıq internetə çıxış və telefon xəttinin qiyməti təxminən 150 ABŞ dolları təşkil edir. Yerli universitetlər üçün internetə çıxış, Amerika kollecləri ilə müqayisə etsək, 50 dəfə bahadır. Qeyd edək ki, Şərqi Afrika optik lif rabitə ilə təchiz olunmamış dünyanın son iri regionlarından biridir. Optik lif xətləri Cənubi Afrika Respublikasından Mozambik, Madaqaskar, Tanzaniya və Keniyaya ötürüləcək, oradan isə Fransa və Hindistanda beynəlxalq şəbəkəyə qoşulacaq. Optik lif şəbəkəsinin 2009-cu ilin iyun ayınadək işə salınacağı gözlənilir. Bundan sonra Şərqi Afrikanın 21 ölkəsini biri-biri ilə və bütün dünya ilə birləşdirəcək daha iki kabelin çəkilməsi planlaşdırılır.
