RƏQƏMSAL DÜNYA

ABŞ-ın "AT&T” mobil rabitə operatoru Kanzas-Siti ştatında "FTTP” (fiber to the premises) texnologiyası üzrə optik-lif şəbəkəsi layihəsinin istifadəyə verilməsini bəyan edib. Bildirilir ki, “Google” şirkətinin analoji “Google Fiber” layihəsi də burada işə salınıb və "AT&T” internet şirkəti ilə rəqabət aparacaq. İnternetə çıxış sürəti saniyədə 1 giqabit təşkil edəcək.

Mobil operatorun “U-verse” adlanan xidmətindən Kanzas-Sitinin ucqar yerlərində, eləcə də ştatın bir neçə digər şəhərində istifadə mümkün olacaq.

“AT&T” Kanzas-Sitidə uzun müddətdir fəaliyyət göstərir, lakin əvvəllər şirkət "U-verse” paketini yalnız "FTTN” (fiber to the node) əsasında təklif edib. İndi isə yeni xidmət “Google Fiber” ilə həm texnologiyasına, həm də sürətinə görə oxşardır.

Standart aylıq paketin qiyməti 70 dollar, İP televiziya ilə birlikdə 120 dollar, televiziya və "VoIP” rabitəsi ilə birlikdə 150 dollar təşkil edəcək. Son dörd il ərzində operator Kanzas-Sitidə şəbəkənin modernləşdirilməsinə 825 milyon dollar xərcləyib.

“AT&T Missouri” prezidenti Con Sandaq deyib ki, bizim üstünlüyümüz geniş şəbəkədədir və biz optik-lif xəttini istifadəçilərin evinə çəkmək üçün artıq hazır infrastrukturdan istifadə edə bilirik.

“AT&T” ümumilikdə “FTTP” texnologiyasını ABŞ-ın 100 şəhərində, o cümlədən 21 aqlomerasiyada tətbiq etməyi planlaşdırır, - "Telekomza” yazır.