TƏHLÜKƏSİZLİK

Kiberinsidentlərə Qarşı Mübarizə Mərkəzi (KQM) şirkət və dövlət qurumlarında süni intellekt (AI) alətlərinin istifadəsi ilə bağlı yeni kibertəhlükəsizlik riskləri barədə xəbərdarlıq edib.

Xeberler.az-ın məlumatına görə, mərkəzdən bildirilib ki, bir çox təşkilat təhlükəsizlik məqsədilə tanınmış AI platformalarına girişi məhdudlaşdırsa da, bu yanaşma problemin tam qarşısını almır və əksinə, nəzarətsiz süni intellekt istifadəsini artıra bilər.

Məlumata görə, rəsmi və təsdiqlənmiş AI alətlərinə giriş məhdudlaşdırıldıqda əməkdaşlar iş proseslərini sürətləndirmək məqsədilə internetdə açıq şəkildə təqdim olunan müxtəlif süni intellekt platformalarından istifadə edirlər. Bu zaman daxili sənədlər, müştəri məlumatları, hesabatlar, müqavilələr və digər həssas fayllar təşkilatın xəbəri və nəzarəti olmadan üçüncü tərəf servislərə yüklənə bilər.

KQM qeyd edir ki, məxfi və həssas məlumatların yalnız naməlum platformalara deyil, ümumilikdə heç bir süni intellekt alətinə icazəsiz və nəzarətsiz şəkildə daxil edilməsi təhlükəsizlik baxımından ciddi risk hesab olunur.

Mərkəzin məlumatına əsasən, kibertəhlükəsizlik sahəsində bu cür nəzarətsiz istifadə “Shadow AI” adlanır. Bu anlayış təşkilat tərəfindən təsdiqlənməyən, təhlükəsizlik tələblərinə uyğunluğu yoxlanılmayan və monitorinqdən kənarda qalan süni intellekt alətlərinin istifadəsini ifadə edir.

Bildirilib ki, əsas təhlükə AI texnologiyasının özündə deyil, onun görünməz və idarəolunmaz formada istifadəsindədir. Belə hallarda məlumatların hansı platformalara ötürüldüyü müəyyən edilmir, audit izi formalaşmır, DLP və digər təhlükəsizlik mexanizmləri effektiv işləyə bilmir. Nəticədə məlumat sızması və fərdi məlumatların ifşası riski artır.

Kiberinsidentlərə Qarşı Mübarizə Mərkəzi vurğulayır ki, AI alətlərinin tam bloklanması hər zaman təhlükəsiz həll hesab olunmur. Çünki bu, istifadəni dayandırmaq əvəzinə onu daha gizli və nəzarətsiz mühitə keçirə bilər. Əməkdaşlar əksər hallarda bu alətlərdən zərərli məqsədlə deyil, işlərini daha sürətli və rahat yerinə yetirmək üçün istifadə edirlər.

Mərkəz şirkət və qurumlara tövsiyə edir ki, süni intellektdən istifadə ilə bağlı daxili qaydalar müəyyən etsinlər, əməkdaşlara təhlükəsiz və təsdiqlənmiş AI həlləri təqdim etsinlər. Həmçinin AI alətlərinə daxil edilməsi qadağan olunan məxfi və həssas məlumatlar aydın şəkildə müəyyənləşdirilməli, əməkdaşlar bu sahədə mütəmadi olaraq maarifləndirilməlidirlər.