İNNOVASİYA VƏ STARTAP

Xəbər verdiyimiz kimi Silikon Vadisinin təmsilçisi Riçard Rasmussen Azərbaycanda bizness seminarları keçirir.

Xeberler.az bildirir ki, Nəqliyyat, Rabitə və Yüksək Texnologiyalar Nazirliyinin Social Innovation Lab İnnovasiya Mərkəzinin birgə təşkilatçılığı ilə iyunun 27-də Azərbaycan Texniki Universitetində İdeyadan biznesə layihəsi çərçivəsində seminar keçirilib.

Seminarda qonaqları salamlayan AzTU-nun prorektoru, professor Sübhan Namazov Azərbaycanda startap layihələrin və təsisatların formalaşdırılması ilə bağlı son illər görülən işlərə nəzər salaraq qısa zaman ərzində yüksək nəticələr əldə olunduğunu qeyd edib. O, NRYTN-in Yüksək Texnologiyalar Parkı ilə Azərbaycan Texniki Universiteti arasında imzalanan əməkdaşlıq müqaviləsinə diqqət çəkərək bildirib ki, Texnoparkın ali təhsil müəssisələri ilə əməkdaşlığı startap mühitinin formalaşdırılması üçün vacib amildir.

Prorektor 1 aydan az vaxtdır ki, həyata keçirilən əməkdaşlıq nəticəsində artıq ikinci uğura imza atıldığını vurğulayıb: “Bir neçə gün öncə bizim alimlərin ixtiraları Yüksək Texnologiyalar Parkının təşəbbüsü ilə önəmli sərgilərdən biri olan nəqliyyat və logistika sərgisində nümayiş olundu. Mühüm şəxslər, eləcə də ictimaiyyət bir daha bu ixtiralarla, onların əhəmiyyəti ilə bağlı məlumatlandırıldı. Bu görüş isə əməkdaşlığa başladığımız 1 ay ərzində bizim ikinci işimizdir. Düşünürəm ki, əməkdaşlığımızdan da istifadə edərək birgə uğurlarımızın sayı artacaq”.

NRYTN-in İnformasiya cəmiyyətinin və elektron idarəçiliyin innovativ inkişafı şöbəsinin müdiri Rəşad Əzizov çıxışında seminarın əhəmiyyətini vurğulayıb. O bildirib ki, Rik Rasmussen ABŞ-ın Silikon Vadisində, eləcə də Kanadada ən məşhur startap ekspertidir: “Rik Rasmussenin ölkəmizdə olması və tələbələrlə təcrübələrini bölüşməsi çox sevindiricidir. Düşünürəm ki, tələbələr bu görüşdən faydalı məlumatlar, startaplarla bağlı yeni metodlar əldə edəcəklər. Çox sevindirici haldır ki, bizim bugünkü görüşümüzdə AzTU tələbələri ilə yanaşı, “İdeyadan biznesə” startap turunun qalibi olan komandaların üzvləri də iştirak edir.”

Kaliforniya Silikon Vadisinin və Berkli Universitetinin təmsilçisi spiker Riçard Rasmussen tərəfindən keçirilən seminar Lokal qalaraq qlobal əhəmiyyəti necə əldə etməli? mövzusuna həsr olunub.

Tədbir çərçivəsində erkən inkişaf mərhələsində olan yerli startapların sürətli böyümə strategiyası, bazar potensialı və digər aktual məsələlər qarşılıqlı olaraq müzakirə olunub.

Bundan başqa, Riçhard Rasmussenin iştirakı ilə Nəqliyyat, Rabitə və Yüksək Texnologiyalar Nazirliyinin dəstəyi ilə yerli inkubatorların iştirakıyla bir sıra universitetlərdə də seminarlar davam edəcək. Tərəflər Azərbaycan və ABŞ-ın üzləşdiyi startap ekosistemi problemlərinin həlli yollarını araşdıracaqlar.

Qeyd edək ki, NRYTN-in dəstəyi və Rik Rasmussenin və yerli inkubatorların iştirakı ilə bir sıra universitetlərdə də seminarlar davam edəcək. Tərəflər Azərbaycan və ABŞ-ın üzləşdiyi startap ekosistemi problemlərinin həlli yollarını araşdıracaq.

Məlumat üçün bildirək ki, Riçard Rasmussen dünyanın ən böyük biznes ideya yarışması olam Climate Launchpad-ın beynəlxalq hakimlərindən biri rolunda çıxış edir.

Sevinc Baba-zadə