TENDER

Vətəndaşlara Xidmət və Sosial İnnovasiyalar üzrə Dövlət Agentliyinin təşəbbüsü ilə ABŞ-ın Silikon Vadisində “Azərbaycan İnnovasiyalar Evi” yaradılacaq.

Xeberler.az bildirir ki, bunu Azərbaycan İnternet Forumunun prezidenti Osman Gündüz deyib.

O bildirib ki, Azərbaycan İnnovasiyalar Evinin yaradılması ölkəmizdə startapçılığa və startap ənənələrinin kütləviləşməsinə müsbət təsir göstərəcək: “İndiyə qədər bizim startaplarımız xaricə gedəndə, xüsusən ABŞ-da Silikon Vadisində olanda görüşlərin təşkili, əlaqələrin qurulması üçün bir mərkəz yox idi. Bu da ciddi problemlər yaradırdı. Məsələn bizə yaxın olan ölkələrin- Ukraynanın, Rusiyanın, Qazaxıstanın və digər ölkələrin Silikon Vadisində bir nümayəndəliyi var idi. Həmin ölkələrin nümayəndələri o mərkəzdən istifadə edərək daha çevik hərəkət edə bilirlər. Orda Azərbaycanın da nümayəndəliyinin yaradılması bu sahədə Azərbaycan startapçılarının, Azərbaycan ekosisteminin inkişafına çox müsbət təsir göstərəcək”.

Osman Gündüz vurğulayıb ki, bu layihə xarici inverstorları yerli startaplara cəlb edəcək: “Startap sahəsində önəmli məsələlərdən biri də investorlardır. İnverstorlar da bu dəqiqə xaricdə mərkəzləşiblər. Yəni onlar yaxşı startapları axtarırlar və onlarla iş birliyi qurmaq istəyirlər. Düşünürəm ki, bizim startapçıların və startapların beynəlxalq inverstorlara əlçatımlılığını güclənməsində də həmin bu Azərbaycan İnnovasiya evi bir mərkəzə çevriləcək və müsbət rol oynayacaq”. 

Xatırladaq ki, ABŞ-ın Şimali Kaliforniya ştatında yerləşən Silikon vadisi dünyanın müxtəlif ölkələrində təqdim olunan startapların cəmləşdiyi individual mərkəzdir.