Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti (XRİTDX) ilə Azərbaycan Texniki Universiteti (AzTU) arasında imzalanmış əməkdaşlıq memorandumu çərçivəsində Xidmətin əməkdaşları tərəfindən sahə üzrə təhsil alan tələbələrə nəzəri, elmi və praktiki təlimlərin keçirilməsi nəzərdə tutulub.
Bunula əlaqədar cari ilin 14 mart tarixində Xidmətin əməkdaşı Nadir Novruzov tərəfindən İnformasiya Təhlükəsizliyi ixtisasında təhsil alan tələbələrə “Sızma testləri (“Penetration testing”). Veb saytlarda rast gəlinən boşluqlar” mövzusunda master dərsi keçirilib.
Məruzəçi Xidmətin kibertəhlükəsizlik sahəsində gündəlik fəaliyyəti haqqında qısa məlumat vermiş, veb saytlara hücumların əsas siniflərini praktiki çalışmalar və sızma testləri şəklində nümayiş etdirmiş, onlara qarşı müdafiə tədbirlərini diqqətə çatdırıb.
Təlim zamanı bir sıra veb saytlarda mövcud boşluqlar göstərilmiş və onların aradan qaldırılması üzrə tövsiyələr verilib.
Qeyd edək ki, Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti (XRİTDX) ilə Azərbaycan Texniki Universiteti (AzTU) arasında əməkdaşlıq haqqında memorandum 2022-ci il 05 noyabr tarixində imzalanıb.
