TƏDBİRLƏR

Azərbaycan Dövlət İqtisad Universiteti (ADİU), Minilliyin Layihəsi (Millennium Project) və Azərbaycan Futuroloqlar Cəmiyyəti (Minilliyin Layihəsinin Azərbaycan bölməsi) ADİU-nun tələbələri üçün gələcəyin tədqiqi və proqnozlaşdırma sahəsində “Azerbaijan Foresight” ingilis dilli birgə tədris-təlim layihəsini həyata keçirirlər.

ADİU-nun tələbələri bir il ərzində ABŞ, İngiltərə, Kanada, İtaliya, Venesuela və Yaponiyanın bu sahədə aparıcı mütəxəssislərinin köməyi ilə gələcəyin tədqiqi və proqnozlaşdırma sahəsində biliklər əldə edəcəklər.

Qeyd edək ki, bu, MDB ərazisində gələcəyin tədqiqi və proqnozlaşdırma sahəsində tədrisin dünya şöhrətli professorlar və tədqiqatçılar tərəfindən həyata keçirildiyi ilk belə layihədir. Layihənin unikal xüsusiyyəti bundan ibarətdir ki, o, on-layn rejimində videokonfrans formatında gerçəkləşdirilir. Müxtəlif ölkələrdən olan müəllimlər eyni vaxtda auditoriya ilə ünsiyyətdə olaraq, prezentasiyaları həyata keçirə və informasiya texnologiyalarının bütün imkanlarından tam istifadə edə bilərlər. Bu, məsafəli təhsil olmayıb, məhz real zamanda virtual məkanda təlimin interaktiv formasıdır. Ali məktəb təhsili təcrübəsində tədris məqsədləri üçün belə formatdan istifadə hələ tətbiq olunmadığından, yeni səciyyə daşıyır.

Söhbət birdəfəlik konfranslardan deyil, tam təhsil layihəsi çərçivəsində planauyğun tədris məşğələlərindən gedir.

Bu il Azərbaycan ilk dəfə Azərbaycan Futuroloqlar Cəmiyyətinin timsalında Planlaşdırma Komitəsinin 15-17 iyulda ABŞ-nın Çikaqo şəhərində keçirilmiş simpoziumunda təmsil olunub.

Minilliyin Layihəsi tərəfindən işlənib hazırlanmış kursun proqramı iki semestr üçün nəzərdə tutulub. Bu, insan fəaliyyətinin və qlobal varlığın müxtəlif sahələrində ən yeni elmi məlumatlardan istifadə edilməklə ingilis dilində 48 saatlıq interaktiv təlimdir.

Minilliyin Layihəsinin 15 Qlobal Çağırışının Azərbaycana və onun iqtisadiyyatına, siyasətinə potensial təsiri, dünya birliyində vəziyyət prizmasından öyrənilməsi və nəzərdən keçirilməsi və bunun nəticəsi kimi tələbələr tərəfindən ölkə üçün bu və ya digər çağırışların tənzimlənməsi məqsədilə fəaliyyət strategiyasına dair təkliflərin ifadəsinə cəhd göstərilməsi nəzərdə tutulur. Həmin çağırışlar sırasında ekologiyanın, sosial inkişafın qlobal problemləri, yeni informasiya cəmiyyəti və bu gün Azərbaycanın gələcək inkişafı üçün gündəlikdə duran digər çağırışlar qeyd olunmalıdır.

Proqramın sonunda imtahanların və diplom işinin nəticələri üzrə bütün məzunlar təşkilatçılardan diplomla təltif olunacaq.