AVADANLIQ

Tokio şəhər hakimiyyəti turistləri paytaxtın görməli yerləri ilə tanış etmək üçün bələdçi rolunu oynayacaq xüsusi informasiya eynəyini sınaqdan keçirib. Qurğu hazırlanma mərhələsində olsa da, Tokionun Minato rayonunun aşağı sinif şagirdləri onu yoxlamaq imkanından yararlanıblar. Eynəyin şüşəsində əsas görməli yerlər, o cümlədən, məşhur Tokio qülləsi və buddizm məbədi Dzodzedzi, eləcə də ora necə gedib çatmaq haqqında informasiya göstərilir.

Tokio hakimiyyət nümayəndələri qeyd edirlər ki, eynək Tokio küçələrində istiqaməti müəyyən etməkdə çətinliklərlə üzləşən xarici turistlər üçün faydalı olacaq. “Biz ümid edirik ki, eynək-bələdçi 2020-ci ildə Tokioda keçiriləcək Yay Olimpiya Oyunlarınadək hazır olacaq”, deyə- rayon administrasiyasının nümayəndəsi Takaxiro Sasaki qeyd edib.

Adi eynək formasında olan kompüterlərin yaxın vaxtlarda populyar mobil qurğulardan biri olacağı gözlənilir. “IHS Inc.” ABŞ şirkətinin proqnozuna əsasən, artıq 3 ildən sonra dünyada bu eynək sahiblərinin sayı 10 milyon nəfəri ötəcək. “Google” şirkətinin oxşar qurğusu isə 2014-cü ildə satışa çıxarılacaq.

Cənubi Koreyanın “Samsung Electronics” və Yaponiyanın “Seiko Epson” şirkətləri də  “ağıllı eynək”lərin hazırlanması üzərində iş aparırlar. (mincom.gov.az)