Vergilər nazirliyinin E-qeydiyyat sistemi istifadəyə verilib
01-07-2011
15:52
Azərbaycan Respublikası Prezidentinin “Dövlət orqanlarının elektron xidmətlər göstərilməsinin təşkili sahəsində bəzi tədbirlər haqqında” Fərmanının icrası ilə əlaqədar və ölkədə sahibkarlığın sürətlə inkişaf etdirilməsi, daha əlverişli biznes mühitinin formalaşdırılması və biznesə başlama prosedurlarının sadələşdirilməsi məqsədilə tətbiq edilən sahibkarlıq fəaliyyəti subyektlərinin qeydiyyatının “Bir pəncərə” prinsipinin davamı olaraq E-qeydiyyat Vergilər Nazirliyi tərəfindən həyata keçirilən mühüm layihələrdən biridir. Sisteminin tətbiqi ilə fiziki şəxslər vergi orqanlarına gəlmədən ölkəmizin istifadəçilərinin sayına görə ən böyük dövlət portallarından biri olan Vergilər Nazirliyinin İnternet Vergi İdarəsində uçota alınacaqlar. Sistemin imkanlarından 18 yaşı tamam olmuş və şəxsiyyət vəsiqəsi almış Azərbaycan Respublikasının vətəndaşları istifadə edə bilərlər. Vergilər Nazirliyi tərəfindən təqdim olunan bu xidmət ölkəmizdə “Elektron hökümət”in yaradılması sahəsində atılan mühüm addımlardan biri olmaqla vergi ödəyiciləri ilə vergi orqanları arasında münasibətlərin daha da sadələşdirilməsinə, səmərəliliyin və şəffaflığın artırılmasına yardım edəcəkdir.
