İNNOVASİYA VƏ STARTAP

Azərbaycanlı Vüqar Usi Zadə MEXC kriptovalyuta birjasının Baş Əməliyyat Direktoru vəzifəsinə təyin edilib. Bu barədə o, öz sosial media hesabında məlumat yayıb.

Xeberler.az məlumat verir ki, Vüqar Usi Zadə paylaşımında bildirib:

“Bu gün mənim üçün yeni və əhəmiyyətli bir mərhələnin başlanğıcıdır. MEXC-ə Baş Əməliyyat Direktoru kimi qoşuluram. İlk Bitcoin əməliyyatımda olduğu kimi, qlobal kripto komandalarına rəhbərlik etdiyim illər ərzində missiyam dəyişməz qalıb: açıq, ədalətli və insan yönümlü maliyyə sistemi qurmaq”

MEXC-in açıqlamasında deyilir ki, Vüqar Usi Zadə təxminən on il əvvəl ənənəvi bankçılıq sistemində qarşılaşdığı çətinliklərdən sonra ilk Bitcoin əməliyyatını həyata keçirib və bu təcrübə onun kriptovalyutalara marağının formalaşmasında əsas rol oynayıb.

Onun sözlərinə görə, kripto sektorunda qalmasının səbəbi insanların maliyyə iştirakını genişləndirən, ədalətli və hər kəs üçün əlçatan sistem qurmaq istəyidir. 2018-ci ildə yaradılan MEXC hazırda istifadəçilərə kriptovalyuta dünyasına ən rahat və təhlükəsiz giriş imkanı təqdim edən aparıcı qlobal kriptobirjalardan biri hesab olunur.

Qeyd edək ki, Vüqar Usi Zadə bundan əvvəl “Bitget”də Baş Əməliyyat Direktoru vəzifəsini icra edib. Onun 15 illik marketinq və kommunikasiya təcrübəsi var. O, “Carlsberg”, “Facebook”, “Danone”, “Coca-Cola” və “Twitter” kimi beynəlxalq şirkətlərlə çalışıb, həmçinin “unicorn” “MarTech” startapı üçün məhsul və brend strategiyası hazırlayıb.

Məlumat üçün bildirək ki, Vüqar Usi Zadə “Edward S. Mason” təqaüdçüsüdür; Harvard Universitetində MPA dərəcəsi alıb və Oksford Universitetinin Saïd Biznes Məktəbində magistratura sonrası təhsil keçib.