ASAN xidmət BMT-də təltif olunacaq

24-06-2015 / 11:30

İyunun 23-də Kolumbiyanın Medellin şəhərində Birləşmiş Millətlər Təşkilatının Dövlət Xidmətləri üzrə Forumu öz işinə başlayıb. Üç gün davam edəcək toplantıya BMT-yə üzv ölkələrin yüksək səviyyəli dövlət və hökumət nümayəndələrinin rəhbərlik etdiyi heyətlər qatılıb. Azərbaycan Forumda Vətəndaşlara Xidmət və Sosial İnnovasiyalar üzrə Dövlət Agentliyinin sədri İnam Kərimovun başçılıq etdiyi nümayəndə heyəti ilə təmsil olunur.

Xeberler.az məlumat verir ki, tədbirin məqsədi ənənəvi olaraq BMT-nin 2015-ci ildə dövlət xidmətlərinin göstərilməsi sahəsində ən uğurlu modellərinin təqdim edilməsidir.

BMT-nin 2015-ci il Dövlət Xidmətləri Mükafatına layiq görülən ASAN xidmət-in təcrübəsini paylaşmaq məqsədilə İnam Kərimov Forumun açılış mərasimində çıxış edib. O, Azərbaycan Prezidenti İlham Əliyev tərəfindən son illər dövlət idarəçiliyinin təkmilləşdirilməsi və modernləşdirilməsi sahəsində həyata keçirilən islahatlar barədə məlumat verib.

Sədr bu islahatların tərkib hissəsi olan ASAN xidmət-in uğurlu fəaliyyəti və Azərbaycanda elektron hökumət sahəsində görülən digər tədbirlər barədə geniş təqdimat edib. ASAN xidmət-in hüquqi-formal xüsusiyyətləri və dövlət xidmətlərinin göstərilməsində səmərəliliyin artırılması baxımından uğurlu və nümunəvi model olaraq üstünlükləri diqqətə çatdırılıb. Vurğulanıb ki, son iki ildə mərkəzlərə müraciət edən 5 milyona yaxın vətəndaşın məmnunluğu təmin edilib.

Təqdimatdan sonra ASAN xidmət barədə hazırlanmış videomaterial nümayiş olunub.

Forum çərçivəsində Azərbaycanın nümayəndə heyətinin “Davamlı inkişaf üçün dövlət xidmətlərinin göstərilməsinin müasirləşdirilməsi” və “2015-ci il dövlət xidmətlərinin göstərilməsi sahəsində qalib - ASAN xidmət” mövzularında təqdimatları keçiriləcək. Qaliblər iyunun 26-da mükafatlandırılacaq.

Xeberler.az


ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə