RƏQƏMSAL DÜNYA

Məlumat verdiyimiz kimi, Bakıda BakuBus şirkətinə məxsus avtobuslarda Wi-Fi xidmətinin ötən il olacağı bildirilmişdi.

Lakin uzun müəddətdir ki, avtobusda Wi-Fi  xidmətinin olduğu göstərilsə də, internetə daxil olmaq mümkün deyil.

Bir müddət öncə məsələ ilə bağlı Bakı Nəqliyyat Agentliyindən Xeberler.az-a bildirilmişdi ki, hazırda şirkətdən aslı olmayan səbəblərə görə Wi-Fi xidmətinin aktiv olması gecikir.

Qeyd edilmişdi ki, BakuBus-larda sistem artıq var. Amma xidmətin aktiv olması üçün müəyyən şirkətlər var ki, tenderdə iştirak edir. Belə ki, Wi-Fi sisteminin tam istifadəyə verilməsi tenderi qazanan şirkətin  təqdim edəcəyi xidmətin keyfiyyətinə görə təşkil ediləcək.

Məlum olduğu kimi, yaxın günlərdə ölkədə  IV İslam Həmrəyliyi Oyunları başlayacaq. Artıq  idmançılar və turistlər Bakıya gəlməyə başlayıb. Ümumiyyətlə, yay dövründə Azərbaycana çox sayda turistlər gəlir. Təbii ki, xaricilərin ictimai yerlərdə, nəqliyyatda axtardığı ən vacib məqamlardan biri də məhz Wi-Fi-dır. Bundan əlavə, yerli əhali də ictimai nəqaliyyatda internet məsələsinə narazılıqlarını bildirir.

Xeberler.az olaraq bunları nəzərə alaraq yenidən məsələ ilə maraqlandıq ki, görəsən BakuBus-larda niyə hələ də Wi-Fi sistemi aktiv deyil?

Bakı Nəqliyyat Agentliyindən verilən məlumata görə, hazırda bu istiqamətdə işlər davam etdirilir. 

Məlumata görə, sistemin yalnız BakuBus yox, bütün avtobuslarında tətbiq edilməsi nəzərdə tutulur. Bunun üçün də  öncə avtobuslar texniki baxımdan yararlı vəziyyətə gətirilməli, kompleks işlər görülməlidir.

Qeyd edilib ki, bu səbəblərə görə, sistemi hazırda aktiv etmək  mümkün deyil.

Avtobuslarda  Wi-Fi sisteminin aktiv olacağı barədə dəqiq vaxt müəyyən edilməsə də, rəsmi açıqlamalardan belə başa dümək olar ki, məsələ gündəmdədir və Agentlik bu istiqamətdə də işlər görür.

Məsələni gündəmdə saxlayacağıq.

Məltəm Talıbzadə