QANUNVERİCİLİK

Ölkə başçısının 26 oktyabr 2007-ci il tarixli Fərmanı ilə nəqliyyat sahəsində İdarəetmə sistemi formalaşdırmaq, ölkədə nəqliyyat axınının effektiv idarəedilməsini təmin etmək üçün Nəqliyyatı İntellektual İdarəetmə Mərkəzi (NİİM) yaradılıb.

Ötən müddət ərzində nəqliyyatın intellektual idarəetmə sisteminin yaradılması sahəsində bu Mərkəz tərəfindən müəyyən işlər görülüb.

Lakin cəmiyyətdə bu quruma birmənalı yanaşma yoxdur.

Ekspertlər və vətəndaşlar qurumun fəaliyyətindən narazılıqlarını bildirirlər ki,  NİİM onun qarşısında qoyulan vəzifələri yerinə yetirə bilmir.

Məsələ ilə bağlı Xeberler.az mütəmadi olaraq açıqlama və araşdırmalar təqdim edir.

Bir müddət öncə isə Milli Məclisin iclasında Nəqliyyatın İntellektual İdarəetmə Mərkəzinin (NİİM) Nəqliyyat Nazirliyindən alınıb Daxili İşlər Nazirliyinə verilməsi də təklif olunub.

Milli Məclisdə qaldırılan bu məsələ  ekspertlər tərəfinən müxtəlif istiqamətlərdə müzakirə olunub.

Xeberler.az olaraq NİİM-in Daxili İşlər Nazirliyinə verilməsinin nə dərəcədə doğru qərar olduğu, ümumiyyətlə qurumun DİN-ə verilməsi ilə bu sahədə hansı müsbət inkişafın olacağı ilə maraqlandıq.

Ekspertlər məsələni Xeberler.az-a şərh edib.

Nəqiyyat üzrə ekspert Ərşad Hüseynov bildirib ki, NİİM-in Daxili İşlər Nazirliyinə verilməsi Milli Məclisdə sadəcə təklif kimi səsləndirilib. Bunun reallaşdırılması isə naməlumdur. Ekspert dünya təcrübəsindən irəli gələrək hesab edir ki, Nəqliyyatın İntellektual İdarəetmə Mərkəzinin Nəqliyyat Nazirliyindən alınıb DİN-ə  verilməsinə ehtiyac yoxdur:

“Bütün dünya ölkələrində yol hərəkəti qaydalarının tənzimlənməsi ilə polisdən kənar bir qurum məşğul olur. Həmin qurum daha çox müstəqil fəaliyyəti ilə seçilir. Dünyada yol hərəkəti təhlükəsizliyi yüksək səviyyədə olan ölkələrdən biri də Finlandiyadır. Burada yol hərəkəti təhlükəsizliyi ilə bağlı agentlik var. Həmin qurum nə Daxili İşlər Nazirliyinə, nə də Nəqliyyat Nazirliyinə tabe deyil”.

Ərşad Hüseynov həmçinin təklif edib ki, işıqforların işinin tənzimlənməsi, sürücülük vəsiqəsinin verilməsi və bir sıra yol hərəkətinin təşkili ilə bağlı məsələlərə yenidən baxılmalıdır:

“Nəqliyyat ilə bağlı bu qədər çoxfunksiyalılıq bir qurumda cəmlənməməlidir. Polisin əsas işi yol hərəkəti təhlükəsizliyinə nəzarət etmək olmalıdır. Qaydanı pozanlar, işıqforun quraşdırılmadığı ərazilər nəzarətə götürülməlidir. Amma işıqforu yerləşdirmək, onu idarə etmək, sürücülük vəsiqəsini təqdim etmək o qurumun səlahiyyətləri çərçivəsində deyil”.

Ərşad Hüseynov qeyd edib ki, Azərbaycanda Yol Hərəkəti Təhlükəsizlik Komissiyası var və NİİM-in üzərinə qoyulan bəzi fəaliyyətlər bu qurumda təşkil oluna bilər.

Onun sözlərinə görə, hazırda dövlət idarəçiliyində təkmilləşdirmə işləri aparılır. Və bu istiqamətdə hansısa addımlar atılacağı labüddür.

Azərbaycan İnternet Forumunun prezidenti Osman Gündüz  bildirib ki, Nəqliyyatı İntellektual İdarəetmə Mərkəzinin (NİİM) əsas məqsədi ölkə yollarında nəqliyyatın hərəkətinin tənzimlənməsi və yol-nəqliyyat  problemlərinin həll olunmasından ibarətdir.

O hesab edir ki, bu günə qədər NİİM qarşısına qoyduğu öhdəlikləri tam yerinə yetirə bilməyib:

“Artıq uzun müddətdir ki, ölkədə nəqliyyat axınının effektiv və çevik formada tənzimlənməsi üçün ölkə başçısının fərmanı ilə geniş infrastruktura malik idarəetmə sistemi yaradılıb.  İşıqforların tənzimlənməsi, tıxacların aradan qaldırılması, yolların idarəedilməsi Mərkəzin birbaşa həyata keçirməli olduğu məsələlərdir”.

Osman Gündüz  Mərkəzin fəaliyyətində xarici ölkə təcrübəsindən bəhrələnməyin də faydalı olacağını vurğulayıb:

“SMS məlumatlandırma vasitəsilə sürücüyə tıxacların olduğu ərazilər bildirişlə göndərilməli və alternativ yollar təklif olunmalıdır. Yəni, bu sistem sürücünü tıxaclı yolda yolda idarə etməlidir”.

Osman Gündüz NİİM-in Baş Dövlət Yol Polisi İdarəsinə verilməsini daha düzgün hesab edib.

Onun sözlərinə görə, NİİM-in səlahiyyətləri informasiyanın çox hissəsinin cəmləşdiyi bu  qurumda –DİN-də cəmlənib. 

Osman Gündüz onu da vurğulayıb ki, NİİM-in bəzi səlahiyyətlərinin ASAN-a verilməsi daha doğru olardı:

“Nəqliyyatda SMS məlumatlandırma və bu kimi xidmətlərin ASAN-a verilməsi daha uğurlu ola bilər. Eyni zmanada Mərkəzin texniki idarəetməsi, telekommunikasiya operatorlarına, Rabitə və Yüksək Texnologiyalar Nazirliyinə verilə bilər”.

Sevinc Çəltikova