PROQRAMLAR

Paytaxtda avtomobillərin küçə parkinqinə elektron dəstək  yaradılıb.

Xeberler.az-ın məlumatına görə,  Bakıda küçə parkinqi elektron qaydada həyata keçiriləcək. Bununla sürücülər əvvəlcədən hansı yerlərin dolu və ya boş olduğundan xəbərdar olacaqlar. Habelə əvvəlcədən həmin yeri bron etdirə biləcəklər. Bunun üçün mobil telefona müəyyən tətbiqi yükləmək lazım olacaq.

Yeni layihə İqtisadiyyat Nazirliyinin Azərbaycanda İxracın və İnvestisiyaların Təşviqi Fondunun dəstəyi ilə həyata keçirilir.

Qeyd edilir ki,  bu məqsədlə Azərbaycan və Macarıstan şirkətləri arasında memorandum imzalanıb. Sürücülər planşet və smartfonlardakı tətbiq vasitəsilə parkinqlərin vəziyyətindən xəbərdar ola biləcəklər.

Şirkətdən verilən məlumata görə, elektron parkinq sisteminin işə düşməsi tıxacların azalmasına da kömək edəcək. Sistemlə avtomobillər üçün yer müəyyən ediləcək. Sürücülər ayrılan yerlərdə avtomobillərin saxlaya biləcəklər.

Yenilik sayəsində avtomobillər üçün park yerini əvvəlcədən bron etmək də mümkün olacaq. Tətbiqdə avtomobilin nömrəsi ilə yanaşı, sürücünün telefonları da qeyd ediləcək. Avtomobilini parkinqdə saxlayan sürücü yeri nə vaxt tərk edəcəyini bildirdikdən sonra, digər sürücülər həmin yeri ala biləcəklər.

Sürücülər avtomobili yalnız parkinqdə saxladığı müddət üçün pul ödəyəcəklər.

Onlar ödəməni həm SMS-lə, həm mobil tətbiqlə, həm bank kartı ilə, həm də nəğd şəkildə həyata keçirə biləcəklər.

 Xeberler.az